La iniziative dai Comuns furlanofons: fasìnle svintulâ no dome ai 3 di Avrîl ma ancje par altris ricorencis de memorie coletive dai furlans
Cualis sono lis zornadis dal an plui impuartantis pe Patrie? In ce ocasions isal di meti fûr la bandiere furlane par che i nestris municipis a ledin a onorâ la nestre identitât? E je vere, come che al à dit il sindic di Udin Pietro Fontanini in ocasions de resinte Assemblee dai sindics de Comunitât Linguistiche Furlane, che za cumò si podarès esponi la bandiere ogni dì fûr dai nestris uficis publics. Magari cussì no, chest nol ven fat e la plui part dai municipis si insiore dal standart di Bertrant dome ai 3 di Avrîl, cuant che e cole la ricorence de Fieste de Patrie, par memoreâ la nassite dal Stât patriarcjâl.
◆ Par chest la Aclif, cul so diretîf vuidât dal president Markus Maurmair, e à imbastît un dibatit par rivâ adore a slargjâ il numar des ocasions li che i Comuns furlanofons a esponaran la bandiere. La propueste e sarà valutade di une Comission che e cirarà di meti dongje ancje Arlef, Filologjiche, Consei Regjonâl e lis Curiis dal teritori dal Friûl storic. A lôr ur vignarà proponude la sielte di une schirie di datis significativis pe storie furlane e pe nestre memorie coletive: in chest dibatit dut câs la Acilf e à gust ancje di cjapâ dentri i citadins plui atents e sensibii che a vuelin dî la lôr, e la “Patrie dal Friûl” e je contente di dâ spazi aes riflessions de int su chest teme.
◆ Lis datis che la Comunitât e à marcadis come rilevantis, tant che une fonde par resonâ su chescj temis, a son: ai 27 di Fevrâr, la Crudêl Joibe Grasse dal 1511; ai 6 di Mai, inovâl dal grant scjas dal Orcolat dal 1976, ultin dai tancj taramots che a àn savoltade la nestre tiere; ai 6 di Jugn, dì dal sassinament dal Patriarcje Bertrant, ricognossût de Glesie come Beât e dai furlans tant che vuide savie e visionarie dal pont di viste politic; ai 7 di Jugn, inovâl de muart de Patrie dal Friûl par opare di Vignesie; ai 12 di Lui, fieste dai sants patrons Ermacore e Fortunât; ai 9 di Otubar, inovâl dal disastri dal Vaiont, simbul di cemût che il rapuart coret dal om cu la nature nol varès mai di jessi sfuarçât tal non dai interès economics.
◆ La valutazion e la riflession a saran fatis intun ambit istituzionâl, ma la partecipazion dai furlans a cheste sielte pe Aclif e sarès impuartante. Cui che al vûl dâ un contribût, disint la sô opinion su chestis sieltis, o al à indreçaments o conseis di dâ, al pues scrivi a aclif@valvasonearzene.it o ae direzion de Patrie info@lapatriedalfriul.org . ❚
