Scuele furlane. Jutoris concrets, no cjacaris

Un altri an di scuele al è finît: ma cemût staie la tutele de marilenghe tes nestris classis? Miôr o piês dal an passât? La rispueste no je facile, come che no je mai stade facile la vite a scuele par cui che al voleve insegnâ furlan: ma a son simpri stâts une vore i mestris che no si son rindûts a cheste situazion e che a àn lavorât istès. Cumò la suaze istituzionâl par puartâ il furlan te azion didatiche di ogni dì e je, ma a restin une vore i berdeis di superâ. A scomençâ dai timps: i dâts des iscrizions (za fatis a Fevrâr) a vegnin comunicâts ae Regjon pai 30 di Setembar. E il trasferiment des risorsis al è lunc: dispès i bêçs a rivin dopo mês e mês, cussì in tancj puescj dulà che nol è automatic cjatâ cui che al insegne furlan, la ore di lezion sielzude dai gjenitôrs pai lôr fîs e ven fate dome tai ultins mês dal an, magari di presse e cence dâ continuitât ae esposizion ae lenghe (robe fondamentâl par imparâ ben).
I dâts des fameis che a intindin zovâsi dal insegnament dal furlan a son stâts simpri bogns, par fortune: ma a cheste domande di educazion bisugne rispuindi cun plui decision (e soredut plui risorsis) de bande de formazion. Al covente jemplâ cun int simpri plui preparade e cui titui juscj la liste di chei che a puedin insegnâ il furlan, e par dâ un jutori a ducj chei che a son za in servizi di un pieç, ae fin dal 2016 al è nassût Docuscuele, il Centri di documentazion, ricercje e sperimentazion pal furlan te scuele. La creature di ARLeF e Filologjiche e sta viazant ben: intun an e mieç e à tirât dongje cu lis sôs iniziativis plui di un miâr di insegnants. Fin cumò lis sôs azions a son stadis indreçadis ae formazion metodologjiche e linguistiche, ae catalogazion des buinis pratichis (che a vegnin cjamadis online su www.scuelefurlane.it) e ae edizion di materiâi valits di puartâ daurman inte programazion didatiche. La serie si clame “Marilenghe te scuele”: l’an passât a son jessûts i prins cinc volums di unitâts modulârs pe scuele primarie, e in chestis setemanis a stan partint par dutis lis scuelis i gnûfs siet volums di “Marilenghe te scuele 2”. Ma dopo chescj 12 volums a pro de scuele primarie, a son za in cantîr chei pe secondarie di prin grant e pe scuele pe infanzie. Jutoris concrets, no cjacaris.
Ma ancje chi al coventarà tai prossims agns il salt di cualitât: ven a stâi si varà di decidi se al è chest il braç operatîf ideâl pe scuele furlane, o se al è stât dome un esperiment biel e partecipât. A sclarîlu, a saran i stanziaments che a vignaran fats de Regjon. Di proclamis, no ‘nd è plui bisugne: a coventin azion e atenzion.
Al è ancjemò un grum di lavôr di fâ, duncje, ma i pas indevant fats inte scuele furlane si puedin viodi e tocjâ cun man. Judâ i mestris dut câs al è compit di ducj, prin di dut des fameis che a àn il dovê di pretindi che ai fîs ur vegni insegnât il furlan cu la stesse dignitât e cualitât di cualsisedi altre materie. Se a podessin dî la lôr, cuntun scandai di valutazion dal percors previodût par dutis lis scuelis de Regjon, magari la lôr vôs e sarès plui scoltade.
di Walter Tomada