TRA TRADIZION E INOVAZION
A Treli di Paulâr, Dina Della Schiava e la fie Chiara Banelli a crein prodots unics, modernis e elegants, cun materiâi atuâi, fats in Cjargne
Tal piçul paisut di Treli di Paulâr si cjate la cjase/buteghe indulà che di agns Dina Della Schiava e Chiara Banelli, su comission, a fasin scarpets.
Dina, cuant che e jere piçule e che no rivave inmò cul nâs fin te taule, e stave oris a cjalâ sô mari che e pontolave scarpets. «O viodevi chestis mans che a paravin dongje scarpets, e mi à simpri incurioside cheste robe. Mê mari no veve timp di stâmi a insegnâ e mi diseve: “Tu as di robâmi il mistîr, e tu viodarâs che tu rivis ancje tu”. O soi cressude e, planc a planc, o ai imparât ancje jo. Cuant che mê fie Chiara e à tacât a puartâ i siei vistîts pal mont, o vin tornât a tirâ fûr i scarpets. Chiara, come me, e je inamorade de Cjargne e e à volût imbinâ i scarpets aes sôs creazions: cussì, e à tacât a dissegnâ e a fâ inovazions sui scarpets».
Dina e Chiara si son adeguadis aes gnovis esigjencis e a àn scugnût fâ cambiaments te lavorazion, in particolâr no fasin plui la suele straponzude parcè che a àn viodût che il pît al reste umit tant sore che sot.
«Cumò o doprin la lane cuete pressade – e conte Dina -, cussì il pît al reste plui sut e al ven metût te lane che e à tantis proprietâts. Però, cui che al vûl un scarpet tradizionâl, nô jal fasin. Pe tomere, la part sore dal scarpet, o cirìn di doprâ materiâl daûr de tradizion di une volte: par esempli il vilût, di buine cualitât e di lungje durade, che lu comprìn a Tumieç. Une volte si doprave frustagn e normalmentri al jere il siôr che al podeve permetisi di comprâlu: il biât al doprave ce che al cjatave ator. Cui peçots, une volte, a fasevin scarpets che a duravin di une albe ae sere. Te suele in pressât di lane, o metìn une gomute. Une volte a metevin la cjamare di arie, ma vuê no si cjate plui. O vin cirût di mantignî ce che a fasevin une volte, cuant che tai scarpets a metevin la gome nere di un centimetri par chei di dîs di vore, e la gome blancje di vot milimetris par chei de fieste. Dut il materiâl che o doprìn nô, lu comprìn in Cjargne – e va indevant Dina -. La ment e je Chiara che a fâs il dissen, ma ancje mi jude a fâ il scarpet. Jê e lavorarès come chei dal ‘800, a man: e refude la machine di cusî! Cuant che jê e à fat il dissen, tocje fâ il stamp; dopo si cîr di fâ un prototip cuntune stofe cualsisedi par viodi cemût che al cole; daspò, si fâs la prime prove cu la stofe che si à di doprâ, e si corezin i difiets. Jo mi domandi cemût che a son rivâts une volte a inventâ i scarpets: o pensi che a sedin stâts brâfs e fenomenâi!».
Dina no à mai tignût cont dal timp che i vûl par fâ un pâr di scarpets. Dal sigûr, a ‘nt covente tant. «Jo mi divertìs a fâ – e conte -. Tocje doprâ la passion: cence chê, no tu rivis a lavorâ ben la stofe. O speri simpri di rivâ a contentâ lis personis».
Cui che al vûl vê un pâr di scarpets unic e personalizât, al baste che si meti in contat cun Dina e Chiara clamant il numar 0433/70705, o mandant une mail ae direzion: dinascarpez@gmail.com
Interessante di viodi la pagjine facebook: https://www.facebook.com/scarpez-di-Dina-Chiara-142341802534970/
di Marta Vezzi