“Saurschotte” e senkl, guscj unics

Par solit a son i oms a lavorâ il lat par fâ formadi; a Sapade, invezit, il mistîr dal fedâr lu davuelzin cun entusiasim e professionalitât dôs fantatis, Marta e Sara Piller Roner, 31 e 33 agns, che tal 2009 a àn rilevât la latarie turnarie dal paîs (pari e nono a ‘nt jerin stâts i presidents) e le àn ristruturade, fasintle deventâ – cence mai sparagnâsi – un pont di riferiment cu la lôr produzion di cualitât. Lis zovinis a lavorin lat di cjavre e di vacje – 120/130 litris in dì – e a produsin formadi di stagjonâ, latarie fresc, formadi tal fen, strachin, jogurt, scuete, spongje e la saurschotte. Il tipic formadi fresc aromatizât cul dragoncel di mont lu fasin dome Marta e Sara te latarie Plodar Kelder di Sapade, in Borgade Fontana, li che si pues cuistâ e cerçâ, te salute pes degustazions, insiemi a chei altris formadis e aes grassinis fumadis cun len di faiâr, come par vieri, dal pari purcitâr. Tal banc frigorifar si cjatin salams, panzetis, lonzis, ardiel, ville (boldons) e senkl (un speck particolâr, fumât e stagjonât par cuatri mês, aromatizât cun cumin e pomulis di barancli). Un satûl di savôrs e di profums sapadins.
Un altri lûc di no pierdi par cui che al cîr lis specialitâts dal teritori – de saurschotte ai formadis di malghe, aes grassinis fin a marmeladis, mîls, infûs e sgnapis – e je La Bottega di Sappada, in Borgade Palù, tal centri dal paîs, gjestide cun passion e competence di Michela e Massimo Casciaro, mestri afinadôr, bon di promovi il so teritori come pôcs cui siei prodots di ecelence, fîs de tradizion e de sapience dai artesans dal gust di Sapade e dal dulintor.

(e.a.)