SAGHE FURLANE. Atile a Aquilee

«Saghe», dal todesc, al volarès dî: racont, leiende. O pensín che tantis leiendis dal Friûl, studiadis a font, a puedin pandinus alc sul passât de nestre çocje che tes leiendis tramandadis di nono in nevôt e ten cont alc di etis lontanis e di gjernaziis tant diferentis che, cul lâ dal timp, a àn dât dongje chest spetacul di miscliç ch’al é il popul furlan.
***
Une des pestelencis plui sfondradis
che no si vevilis mai viodudis, garantide ch’al é Atile.
«Tu sês un Atile!». I berle la mame al so frut, cuant ch’al fische sú dut. E i nonos lu clamavin «Flagjelun Dei» come a dî: «Che Diu nus deliberi, s’al pues!».
A vuelin dî che là ch’al passave lui no penave altri nancje la jerbe, tant al veve di jessi stât un tuessin…
Ben, chel mostro ch’al veve bielzà sdrumât mieç mont, no ti rivial, une brute dì, dapît des muris di Aquilee!
O vês di savê che Aquilee in chê voltone, e jere une citât cetant grande. E no dome, ma ancje un grum impuartant, par vie ch’e veve il plui grant marcjât de Alte Italie, e che dute la marcanzie e rivave alì, prin di inviâsi sú pes Gjermaniis traviers la Mont di Crôs.
Poben cjo, chel barabar al jere là, da pît des sôs muris,
cuntune pice mate di netâ e di rafâ sú dut.
Ma Aquilee no molave.
Al veve ben lui fats sú argagns di vuere, al veve inmaneât ogni sorte di trainis e di ingjans: la citât, nol pareve che nancje no si scomponès. Tant che une dì, strac e malapaiât al dé ai siei chest befel: «Ràus!» al berghelà — «Cheste volte le vin cjapade tal comedon; nus conven gambiâ aiar, parcè che chei là sú no molin nancje s’o crichìn!».
Za a stevin par cjapâ sú dut e sbaracâ, cuant che un dai strolics di Atile al capità dongje vosant: «Laiso vie di cjâf? Po no viodêso che Aquilee e je sui paradôrs?»
E cul dêt al segnave bande des muris, là che un cjap di ucelats a uso ocjis grandis e secjis a stevin svolant vie.
Viodi lis cicognis di Aquilee che s’inde levin par no crepâ di fan, e capî che la citât e jere ormai al stremit, al fo dut une.
Atile al ordenà a sec che ognidun al tornàs sul so puest a spietâ che la valorose citât e colàs dibessole, a fuarce di fan e di maluserie.
Cussì la strente di vuere si mudà tune vegle pal grant muribont…
E intant che il sanc di Atile al tufave di asse e di svindic, il sanc di dut il mont cristian s’inglaçave pe sbigule che la muart de grande Aquilee e menave dongje. ❚
pre ‘Sef Cjargnel