Il fondadôr dal sodalizi furlan di ciclisim,
al conte l’implant metût sù par sburtâ
tancj atletis intal professionisim di aur
Di agns incà, un dai zûcs plui preseâts tra i apassionâts di ciclisim furlan al è chel di meti adun ducj i nons dai atletis che a son passâts, di zovins, dal Cycling Team Friuli, par rivâ a fissâ il nivel competitîf de scuadre. Il risultât che al ven fûr al è di no crodi: e vignarès une clape par cori intal World Tour, cence fastidis. E se al è cualchidun che nol sa ce che al è il World Tour intal ciclisim, al è avonde savê che al è il nivel mondiâl plui alt, indulà che a corin il Tour de France, il Zîr di Italie, la Milan-Sanremo, la Parîs-Roubaix, il Zîr des Fiandris… Une robe ufo, massime cumò, che une gnove briade di zovins e à tacât a tirâ sù cetant spetacul pardut.
◆ Par rivâ a chel nivel, une des stradis plui siguris par un zovin e je chê di cori par scuadris come il Cycling Team Friuli: il sisteme metût sù di Roberto Bressan e dai siei colaboradôrs, par insegnâur ai atletis a jessi pardabon cicliscj, cuntun vivôr cetant fuart.
_
Roberto Bressan, cuâl isal il segret dal sucès dal Cycling Team Friuli?
“Nissun artifici, nissun segret: dome tant lavôr, cun etiche dute furlane. O vin a cefâ cun personis che a àn competence: personis che intai agns passâts a son stâts atletis, cicliscj e che duncje a cognossin une vore ben il mont dal ciclisim, a ducj i nivei. Tecnics, dirigjents, preparadôrs atletics, nutrizioniscj, mecanics: ducj oms e feminis che a àn metût inzen e dedizion pe cause de scuadre. Dut achì”.
_
Ven a stâi che al è un lavôr di scuadre?
“Massime chel. La mê ativitât di manager e conte une vore. Dut câs, la presince e la professionalitât di int come Renzo Boscolo, Andrea Fusaz, che al è chel che al coordene ducj i tecnics e il lavôr sientific cui coridôrs, e la opare di dute la organizazion e paie cetant ben. Intai ultins doi agns o vin fat un acuardi cui professioniscj dal Team Bahrein Victorious e o sin dentri di un mecanisim invueleât. Dut il sisteme al è metût sù par lavorâ il miôr pussibil par dâi il dret ai zovins che a corin intes scuadris dai diletants, di mût di cressi, preparâsi e jessi pronts par cuant che i professioniscj a clamin.”
_
Cemût veviso scomençât sul tacâ dai agns Doi mil?
“O sin partîts di zero, pardabon. Ven a stâi che no savevin indulà che o saressin rivâts. O vevin, insiemi, trancuilitât e motivazions cetant fuartis. Lant indenant, o vin cjatât cualchi bon coridôr e il svolt al è rivât intal 2010, cuant che Alessandro De Marchi al à tacât a cori cui nestris colôrs e, cun lui e chei altris atletis, o vin fat il prin salt di cualitât. De Marchi al rivave di cuatri agns cu la scuadre under 23 de Bibanese e al à decidût di cori cun nô il prin an inte categorie élite. Cun lui o vin scomençât a lavorâ cuntun metodi precîs, sientific, e i risultâts a son rivâts une vore in curt”.
_
Al sarès interessant savê se, cence chê decision, al sarès dut câs deventât il De Marchi che al è protagonist di agns tal World Tour. Nissune cuintriprove?
“No covente cuintriprove: o soi sigûr e o pues garantî che al leve fuart, ma nol rivave a sburtâ chel tic di plui par jessi competitîf a nivel plui alt, come che daspò di chei agns al è stât. Nuie cuintri de Bibanese, che al sedi clâr: al è dome just dî che tal Cycling Team Friuli al à cjatât un sisteme diviers di alenâsi e motivazions plui penzis par lâ indenant inte maniere juste.”
_
Dal principi, o vês sburtât une vore su la varietât di dissipline. No dome strade, ancje piste, cross: une sielte ponderade.
“Intai prins agns o fasevin massime strade e ciclocross. Daspò, cuant che a son rivâts coridôrs cun prerogativis diviersis, o vin tacât a cori in piste. Jo o levi daûr de scuadre nazionâl di piste, ator pes manifestazions europeanis, lis classichis “Sîs dîs” dal calendari internazionâl, e o vin cjapade la strade indulà che o sin ancje cumò. Nol è facil: pense che un atlete tant che Bryan Olivo al fâs strade, piste, ciclocross, al cor cuintri il timp e al rive a jessi competitîf pardut. E par rivâ a chei nivei, al covente alenâsi pardabon intal mût plui coret”.
_
In di vuê, cjalant il spetacul mostrât di atletis come Van der Poel, Van Aert, Pidcock, Evenpoel, ducj abii intal cori e vinci in dutis lis specialitâts dal ciclisim, si capìs che la varietât des dissiplinis e je la cjarte che e vinç. Voaltris o vevis capît dut bielzà intal 2010.
“L’esempli al è simpri Bryan Olivo. Di zovenut al è stât campion talian intal ciclocross e si puntiliave di lâ indenant dome cun chel. O vin scugnût impontâsi cun lui e sclarî il concet che il cross si cumbine ben cu la strade, ma no cu la piste. Cumò, i risultâts a son une vore preseâts, parcè che al è deventât campion talian a cronometri, al vinç in piste e al va cetant ben su strade.”
_
Un dai conseis che Roberto Bressan al à dât a un zovin cualchi an indaûr al à daspò fat la fortune dal ciclisim talian: sburtâ in piste Jonathan Milan.
“Cun Jonathan al è stât un percors no tant sempliç, ma le vin petade. Si viodeve che al jere un atlete cun potenzialitâts di no crodi. O vin mateât un an par tirâ fûr dute chê fuarce e par convincilu di ce che al podeve fâ. Si scuen visâsi che, in chê volte, al veve 18 agns e i vûl un tic di timp par che un tant zovin al sedi cussient di dut. Milan al veve vinçût cinc garis inte la categorie juniores prime di rivâ cun nô, ma nol jere masse seguît. Cuant che al à fat un test atletic cun Andrea Fusaz o vin capît dal moment che al jere un campion potenziâl: o vin viodût ce che nissun al veve viodût. E la storie che e je vignude fûr daspò di chê volte, le cognossìn ducj: cumò al è campion olimpic e campion dal mont in piste, e dutis lis scuadris plui impuartantis a àn voie di vêlu”.
_
Tornâ a scomençâ cumò, come intal 2005: saressial compagn o diferent, plui facil o plui dificil?
“Biele domande! Prin di dut, si scuen simpri viodi lis risorsis a disposizion. Cui bêçs si pues menâ i zovins a fâ garis cetant impuartantis, a nivel plui alt, cuasi simpri corsis a tapis internazionâls. Cence bêçs, no si rivarès a fâ dut. Forsit, lant indaûr, o cambiarès alc e, forsit, cualchi coridôr. Dut câs, jessi deventâts une scuadre di nivel “continentâl” al è stât preseât parcè che o vin capît tant miôr cemût che al funzione il mont dal ciclisim a un nivel plui alt: esperience cetant positive”. ❚
:::::::::::::::::::::::::::::::::::::::::::::::::::::::::::::::::
La storie di un sucès dut furlan
FOTO A DRETE: DI ÇAMPE ROBERTO BRESSAN, ALESSANDRO DE MARCHI, RENZO BOSCOLO
Il Cycling Team Friuli al è stât fondât tal 2005 e al à tacât a fâ cori i siei atletis intes garis dai under 23 e dai élite inte Vierte dal 2006. I prins agns a son stâts di adatament inte categorie élite e under 23, ven a stâi dai diletants. Dut câs, cun coridôrs come Bevilacqua, Ciccone e Ponta a son rivâts in curt biei risultâts. Cun Alessandro De Marchi e Alex Buttazzoni, campion talian in piste, intal 2010, il sodalizi dal president Bressan al à tacât a fâsi cognossi a nivel nazionâl.
◆ Intal 2015, purtrop, la disgracie di Andrea Carolo, zovin ciclist muart par une malatie dal cûr, e à lassât ducj cence peraulis. Di chê situazion, il Team al à tornât a rimpinâsi sù intes classifichis cun altris atletis une vore bulos.
◆ Cun Matteo Fabbro, di Codroip, i fradis Davide e Mattia Bais, Nicola Venchiarutti di Osôf, a son rivadis vitoriis une daûr chê altre. Impressionant massime Fabbro, cuant che al à vinçût a San Denêl, intal 2017, inte ultime corse prime di passâ cui professioniscj. I ultins blancs e neris intal World Tour a son Nicolò Buratti, Giovanni Aleotti, ducj atletis de Nazionâl e cumò protagoniscj al plan disore. Cence dismenteâsi di atletis forescj, come Fran Miholjevic, campion de Croazie. ❚
::::::::::::::::::::::::::::::::::::::::::::::::::::::::::::::
La cope de citât di San Denêl il prin martars di Otubar: ocasion di segnâ sul lunari
Daspò dal Zîr ciclistic internazionâl de Regjon Friûl-Vignesie Julie, corût dal 31 di Avost ai 3 di Setembar e metût sù de Libertas di Sarsêt, la ocasion miôr di viodi a cori i zovins di Roberto Bressan e sarà ai 4 di Otubar. I Blancs e Neris a àn vinçût intal 2017 cun Fabbro e intal 2019 cun Aleotti. Biacemai che al rivàs un sucès ancje chest an. ❚
