RIFLESSION – 3. Identitât e universalitât inte bibie

3. Le ideologjie universalistiche in Alexandros il Grant
Tal 336 p.C., a la etât di 20 agns, Alexandros, daspò jessi stât proclamât Re dai Macedons (Baseleùs Makedónon) al partìs cuntun esercit di 30.000 soldats e 4.500 cavalîrs par scombati i persians. In dîs agns di vueris al concuiste la Anatolie, la Palestine, l’Egjit, la Assirie Babilonie, la Persie e dutis chês altris satrapiis fin che al è rivât in Indie. Daspò vê passât l’Indo al à cirût di rivâ al Gange ma i siei soldâts si son stufâts di scombati e no àn volût plui lâ indenant.
Tal 324 p.C. al è tornât a Susa, indulà che al à riorganizât l’esercit e insiemit ai tancj aristocratics macedons al à sposât principessis persianis (Alexandros al à sposât la fie di Artaserse III e la fie di Dario III). Dut chest al da lûc a un grant malstâ de bande dai macedons e a la fin, intal 323 p.C., Alexandros al mûr daspò un licôf, forsit invelenât (323 p.C.).
L’imperi di Alexandros al ven dividût tra i siei gjenerâi, ma la idee di une difusion in dut il mont cognossût de culture e de lenghe greghe si è bielzà realizade. In dutis lis citâts si formin liceus, indulà che i zovins a fasin gjinastiche e a studiin filosofie e leterature. Dapardut si fasin sù teatris e si rapresentin lis comedis e lis tragjediis greghis.
Alexandros al samee che nol fos plui di tant interessât a la cuistion universalistiche. A man a man che al leve indenant concuistant gnovis tieris, i soldâts grêcs e macedons a deventavin simpri plui vecjos e stufs di scombati. Duncje, al à scugnût prime doprâ mercenaris e a la fin fâ jentrâ intes falangjis macedonis zovins persians. A chel pont, la assemblee dai vuerîrs che i garantive di jessi Re no jere plui chê dai macedons ma e jere plui universâl. Duncje Alexandros nol jere plui dome re dai Macedons, hegemon dai Grêcs o sucessôr dai Achemenidis ma si jere bielzà autoproclamât: “fi di Zeus” (come Dionisi) e “Theós Aníketos”: Diu Invincibil!. (al va indevant) ■
Franc Fari – de Universitât dal Friûl