RICETE. Risot “moscatel”

Timp pe preparazion: une miezorute
Ingredients par cuatri personis
un rap di ue moscade, rîs Carnaroli (70 gr a persone), vin blanc (moscatel o un blanc sec profumât tant che un Sauvignon), brut vegjetâl, formadi par mantecâ

SI FÂS CUSSÌ
Setembar  al è un mês elegant, nol è fat par pes robis estremis ma un mês bon par gjoldisi lis sfumaduris, lis finecis. Alore nuie di miôr che un bon risotut, di gjoldisi intune cenute romantiche su la terace al clâr di lune. Un risot al è un risot, la procedure e je simpri chê. Scjaldâ la cuince (un got di vueli, in chest câs nol covente un gran scaltrît), e un spic di ai di gjavâ a pene che al tache a indorâsi. Po dopo si bute il rîs, si lu lasse brustulâ par cualchi secont, e si sfume cul vin (se o fasìn il risot a la ue moscade, des dôs une: o un vin moscatel, che i somei a la ue, o un blanc sec profumât, che al dedi un savôr plui garp al plat). Po dopo si tache a rionzi cun brût (in chest câs vegjetâl), plan plan a flame medie basse, e cuant che il rîs al è cuasi cuet, si zontin i grans di ue, e si lasse lâ insom. Ultime mosse, fûr de flame, mantecâ cul formadi, che si amalgami tal rîs cjalt. Cu la ue moscade, par mantecâ, al va benon il gorgonzola, ma ancjemò miôr un caprin o un latarie saurît ma no masse, che il formadi nol plati il profum da la ue. E meti tal plat di corse… ❚
Margherita Meggy Timeus