Renato Della Torre: cultôr furlan di musiche e di art

A colin chest an i vincj agns de muart di Renato Della Torre, musicolic, musicist, umanist, critic musicâl e insegnant udinês. Une ment fine e sorefine, grant cultôr di musiche e di art, persone sensibile e disponibile a judâ une vore di personis, soredut artiscj, musiciscj, compositôrs, stant che l’ambient musicâl al è simpri stât il so habitat ideâl.
◆ Si jere diplomât in pianoforte studiant cun Valeria Marcotti e perfezionantsi cun Vincenzo Vitale, mestri innomenât de scuele pianistiche napoletane, e cun Calzo Zecchi a Salisburc. Ma la so sêt di savê lu à puartât a aprofondî lis sôs competencis, e alore si è metût a studiâ ancje clavicembal e orghin cun Fiorella Brancacci e Maria Puxeddu, e composizion cun Bruno Coltro. Oltri che tai conservatoris, al à studiât ancje intes universitâts, come a Triest, discutint une tesi in storie medievâl, cuistant competencis ancje in archivistiche, paleografie e diplomatiche. Al à studiât ancje a Padue e Bologne, discutint une tesi in chest câs sul liût e sui liutiscj in Friûl vie pal Cinccent. Nol va dismenteât, tra lis sôs tantis publicazions e ricercjis aprofondidis, che al è stât premiât de Presidence dal Consei dai Ministris talian pal so studi jessût tal 1979 “L’abbazia di Sesto in Sylvis, dalle origini alla fine del Duecento”.
◆ Si cjatin tantis informazions su chest studiôs sul Dizionari biografic dai furlans, indulà che si pues lei ancje la sô siore bibliografie che e ten cont di tancj studis tal cjamp de musiche in Friûl, come lis notis su lis ativitâts musicâls chi di nô, e la discuvierte di doi imnis cividins de tarde Medie Ete. Si è interessât di prassi esecutive tal Rinassiment, cu la scriture di ats par cunvignis organizadis dal Côr Polifonic di Rude, al à scrit su la Cuintririforme in Friûl dal pont di viste musicâl, di musiche e eresiis tal Patriarcjât di Aquilee inte seconde metât dal secul XVI, e inmò tant altri.
◆ Docent une vore amât di storie e estetiche musicâl tal Conservatori di Udin, al è stât dentri dal istitût ancje come bibliotecari e vicediretôr. Al è stât, ancje dongje, il fondadôr e president dal Istitût furlan di Musicologjie, un ent une vore impuartant e che al meretarès di jessi rifondât, parcè che purtrop nol è plui atîf.
◆ Ancje in chest Renato Della Torre, come par tantis altris ativitâts tacadis e menadis indevant di lui, al è stât mestri, atent a dâ valôr, cun tante serietât e costance, a aspiets inedits de culture musicâl furlane, cun tant mistîr a nivel comunicatîf. Su chest, si à di citâ la sô ativitât lungje di critic musicâl pal Messaggero Veneto, che lu à puartât a assisti miârs di concierts par passe trente agns, e rivant simpri a dâ valôr ai artiscj e ai compositôrs de nestre tiere. Al à davuelt une ativitât didatiche impuartante ancje pe Academie di art dramatiche Nico Pepe di Udin e pe Scuele di Musiche di Gurize, cence contâ lis tantis presincis come conferencîr e musicist al clavicembal. Grant amant de musiche antighe, al è stât ancje fondadôr dal insiemi “A solis ortu”, interessantsi al recupar di autôrs furlans o naturalizâts furlans che a àn operât inte nestre tiere. ❚