Il colezionist, che al à tirât sù un spazi espositîf sot dal cjampanili plui alt de Italie, al à in mostre cetancj ogjets che a fasin part de storie
e de culture sportive dal Friûl
Ciclisim, passion, storie e condivision di dut ce che al è peât al sport de biciclete e no dome. Cemût ise nassude la idee dal “Ciclismuseo”?
“Cu la definizion di “Ciclismuseo Mortegliano” o soi rivât a fissâ e a tignî dongje dutis lis mês passions: la biciclete, il colezionisim, il sport e il gno paîs. In bande dal gno lavôr inte buteghe di bicicletis e te oficine di assistence mecaniche, o ai mateât une vite par meti adun ducj i tocs che si viodin intal museu. Cun dute la pazience, la buine volontât, il voli, lis cognossincis justis e la condivision cun altris colezioniscj, o ai vude ancje tante fortune, parcè che nol è simpri scontât rivâ a tirâ fûr antigaiis di presi”.
_
Il prin toc?
“Si scuen tornâ indaûr une vore intal timp. Come ducj i fantacins, o ai fat colezion di boi di pueste, in principi chei gjenerics e cul timp simpri plui specifics, chei dai campions dal sport e dal ciclisim. Plui tart o soi lât indenant cun cartulinis, gjornâi e rivistis. In chê dì che o soi rivât a tirâ dongje une biciclete dal 1946 une vore impuartante, o jeri za dentri ad implen te ativitât. O vevi il puest par meti dut, o ai cjatât cetantis bielis maiutis di cicliscj e di campions e, un pôc par volte, mi è vignude la suste dal colezionisim”. _
Cemût si devential colezionist?
“Al è une vore util savê ben i detais de materie. Lis bicicletis a son il gno lavôr inte mê buteghe e al covente savê ben lis marchis, lis tecnichis di costruzion, i agns di produzion e vie indenant. Bisugne studiâ, vê spirt di osservazion, pazience e timp par stâ daûr a tantis iniziativis”.
_
Ise competizion tal mont dai colezioniscj?
“Dificil, ti disarès di no. Cualchi volte al ven fûr un toc di valôr alt e alore e scomence une aste, ma mi soi simpri tignût in bande. Dome une volte o ai vude une fortune di no crodi e o ai cjatât un toc di colezion une vore preseât. Si scuen cognossi la materie, savê ce robe cirî, indulà cirî e tignî iniment che il timp al è galantom”.
_
Cualchi fatarel simpatic di contâ?
“Un al à a ce fâ cun Mortean e nol è peât al ciclisim. O jeri a Padue, te fiere europeane plui impuartante di machinis storichis. Alì si sa che a rivin pardabon ducj i colezioniscj e plui di cualchidun di lôr al vendeve tocs particolârs. Jo o lavi ator a cirî massime tocs di bicicletis, figurinis o boi. Di bot, o ai viodût un pacut di numars di une vecje riviste che si clamave “Sport Illustrato e la Guerra”: robe dai agns de prime vuere mondiâl. Come simpri, in chei câs, o cjali lis cuviertis par individuâ cicliscj o dut câs altris fats leâts al ciclisim. Zire e torne zire, o cjati une cuvierte cuntune fotografie familiâr: il re Vittorio Emanuele fotografât in place a Mortean intal 1915. Il non dal paîs nol jere citât, parcè che la didascalie e diseve dome “Il Re al fronte”.
_
Âstu cognossût Gino Bartali?
“Intal 1990 al lave ator par fâ promozion pes sôs bicicletis e, midiant di Marino Rossi di Udin, al è rivât te mê buteghe, a Mortean. In chei agns, no vevi ancjemò metût sù il museu come che si viôt vuê. O vevi dome une piçule colezion su di lui e je ai mostrade a Bartali. Dopo di chel incuintri, o sin lâts a cene e al è stât une vore biel. Mi à lassât cualchi sô maiute origjinâl. E nol jere dome Bartali, al è rivât ancje Ercole Baldini. Mi fâs plasè ricuardâ ancje altris come Marino Vigna, che al à vinçût l’aur aes Olimpiadis di Rome intal 1960, e Riccardo Magrini, un che al à vinçût une tape al Tour de France. Par tirâ dongje tocs preseâts mi à judât une vore Franco Canciani, professionist di San Ganzian”.
_
Âstu dome antichitâts?
“No, ancje robe plui moderne, di atletis locâi. Lis maiutis di Elena Cecchini e dal so om Elia Viviani, che al è un furlan adotât. Chê di Tamara Versolatto, che e je di Mortean, e di tancj altris atletis furlans come Michele Pittacolo. Dut câs, il plui impuartant, forsit ancje plui di Bartali, al è il campion di Mortean, Virginio Pizzali. Nissun al à tignût e conservât i ricuarts e i tocs origjinâi di dute la cariere di Virginio. O ai dutis lis maiutis, i trofeus, i ricognossiments, lis fotografiis e i articui di gjornâl che a fevelin di lui. La monture di campion dal mont dal 1957 e je uniche”.
_
Trop isal cambiât il ciclisim intai agns?
“Vuê al è dute une altre robe. In tancj si son distacâts parcè che cumò une vore di atletis a vincin cence fantasie e dut al è masse esasperât. Cjalìn la piste: di cuant che il gjaponês Koichi Nakano al à tacât a vinci dome cu la fuarce e la potence, al à scancelât la tecniche e la tatiche di int come Maspes e Gaiardoni. Su la strade al è compagn. In tancj a àn vinçût cence meti masse fantasie e i apassionâts a van simpri plui dispès a cirî emozions intes colezions e intai ricuarts. Jo o soi lât su lis stradis dal Stelvio, dal Pordoi e, cul jessi là sù, mi soi impensât che o jeri sul stes percors dulà che a àn corût Bartali, Coppi, Gimondi. Salacor, al è chest il motîf che al spieghe parcè che il ciclisim al è e al reste cussì preseât”.
_
Un toc che no tu rivis a vê?
“Une cruzie e je che Virginio Pizzali nol è mai rivât a fâ une fotografie cun Fausto Coppi, a Parîs, cuant che a corevin in piste”. ❚
:::::::::::::::::::::::::::::::::::::::::::::::::::::::::::::::::::::::::::::::::::::::::::
“CICLISMO PASSIONE MIA”. Il libri fotografic che al conte il preseât mateâ di Renato
Il titul al spie za dut: “Ciclismo passione mia”. Renato Bulfon al à metût intun biel libri fotografic il materiâl che al à tirât dongje in passe cincuante agns di ativitât come colezionist. Intal volum, stampât intal 2021, si lein ancje lis storiis contadis di un dai plui preseâts gjornaliscj talians di ciclisim, Marco Pastonesi.
◆ Imagjins, antigaiis, fotografiis, documents storics: si rive a fâsi une culture pardabon complete su dut ce che al è stât il ciclisim intal secul XX e di indulà che e rive la passion dal Friûl e de Italie pes dôs ruedis.
◆ “O pensi di jessi nassût colezionist. – al scrîf Renato inte introduzion – O ai scomençât cui boi e cu lis figurinis. Lis mitichis “Sidam” dal ciclisim e, forsit, a son stadis lôr che mi àn fat inamorâ di bot di chest sport”.
◆ Pagjine dopo pagjine, e dopo vê letis lis peraulis di Enzo Cainero e dai gjornaliscj Claudio Gregori e Antonio Simeoli, al ven voie di deventâ colezioniscj. Se no si à cheste pussibilitât, si pues simpri lâ a Mortean, intal “Ciclismuseo” di Renato, a gjoldisi dut chel ben di diu.
◆ “I ai domandât tantis voltis a Renato – al scriveve Enzo Cainero – di meti sù mostris cul so biel materiâl dongje dai events ciclistics e no dome che o ai organizât. I fâs onôr jessi rivât a impensâsi di ducj i atletis che a son stâts un riferiment sportîf cetant impuartant pal nestri Friûl”.
◆ No dome ciclisim, dut câs. Di Cjasielis di Mortean al jere ancje Ezio Pascutti, il “bomber” dal Bologne e de nazionâl taliane di balon intai agns Cincuante e Sessante. Un altri tesaur che Renato al à simpri tignût iniment. ❚
:::::::::::::::::::::::::::::::::::::::::::::::::::::::::::::::::::::::::::::::::::::::::
MORTEAN COLÔR DI ROSE. Il paîs al spiete la tape dal Zîr di Italie par gjoldisi une biele zornade di sport
A i prins di Març e je stade la presentazion de tape dal Zîr di Italie 2024 che e partirà di Mortean vinars ai 24 di Mai. Renato Bulfon al è une des fuarcis che il paîs de Blave al metarà in cjamp par cheste zornade di fieste, cundut che une vore di int e di volontaris a son ancjemò daûr a mateâ cui lavôrs par comedâ lis cjasis dai dams de tampiestade dal Istât passât.
◆ I grancj campions a saran dongje dal Ciclismuseo, e a podaran gjoldisi la colezion des bicicletis di Fausto Coppi e di Gino Bartali, e dut il materiâl peât a Marco Pantani.
◆ Par une volte, si podarès dî che la mont, ven a stâi la caravane dal Zîr, cun ducj i siei cicliscj sedi talians che forescj innomenâts a nivel internazionâl, e je lade li di Maomet, ven a stâi Renato Bulfon. Agns indaûr par Mortean al jere za passât il Zîr di Italie feminin. Cumò al rive ancje chel dai oms par insiorâ ancjemò di plui la colezion di robis che Renato al pues contâ di vê vût in cjase. ❚
