Referendum un NO cuintri de neo centralizazion

Di une bande il guvier, e buine part dal partît che lu ten in pîts; di chê altre lis oposizions. Di une bande i esponents des categoriis e dai podês economics (dai industriâi aes bancjis, fin ae Coldiretti) che a sburtin pal cambiament, di chê altre tancj esponents de societât civîl che si stan movint di bessôi, cence bêçs ma cuntune vore di determinazion, par evitâ modifichis che nus fasin lâ di mâl in piês.
Chest al è il cuadri des posizions dai fronts che a scombatin par fâ votâ Si o No al referendum costituzionâl dai 4 di Dicembar. In Italie il premier Renzi al fasarà di dut par fâ passâ la riforme, ancje cambiâ la leç eletorâl (Italicum) o sgarfâ fûr dal passât un progjet improponibil come il puint sul Stret di Messine: idee di pueste par vê i consens dai sicilians, che a saran determinants. A Palermo difat no son convints che l’intese jenfri Stât e Regjon previodude de riforme e bastarà a garantî la lôr autonomie, come che a disin chei che a poin la riforme. A san che la Leç Costituzionâl che a varès di aprovâ il lôr Statût e à di jessi votade di un Parlament ostîl aes specialitâts, soredut ae lôr che e à une nomee di Autonomie une vore “strace bêçs”.
Ancje noaltris no varessin di fidâsi masse, se o volìn tutelâ la nestre autonomie: ma par cuietâ dutis lis resistencis la presidente Debora Serracchiani è a convocât a Udin ai 7 di Otubar une cunvigne invidant ducj i esponents des altris Regjons speciâls a sigurânus che la gnove Costituzion no coparà ma parfin e slargjarà l’autonomie.
A part la considerazion che i fonts de Regjon no varessin di coventâ par fâ propagande politiche ni pal Si ni pal No, al ven di domandâsi ce che al sarès de nestre autonomie intun contest li che dutis lis Regjons a statût ordenari a vegnin depotenziadis e lassadis cence competencis. A vignaressin cjaladis ancjemò piês come privilegjadis, e il Parlament, fat soredut di esponents di Regjons no speciâls, al cjaparès ogni ocasion par penalizâlis.
Ocjo duncje! Ai 4 di Dicembar no si vote dome par ridusi il numar dai Senatôrs (e la nestre Regjon a ‘ndi varà dome doi, salacor nissun furlan), ma soredut par decidi il rapuart jenfri Stât e Regjons. La centralizazion e je in vore e nissun al po garantî che la Riforme le fermarà su la Livence o sul Tiliment. Se la riforme no passarà, invezit, dut al restarà cemût che al è, cence lâ a cirî gnot. ❚
✒ Walter Tomada