Record tal numar des pissinis tes cjasis, a son passe 48 mil

Il cantin al torne cetant presint intai moments, come chei di cumò, là che la aghe e la energjie a son pocjis. Cun di fat, ogni an sul imprin dal Istât e cres la dibisugne di aghe e chest al diven propit de presince di masse pissinis privadis, no dome intai paîs, ma ancje intes citâts. Ben clâr che lis pissinis al covente jemplâlis! In cualchi strade di Clanfurt no si cjatin plui zardins cence la pissine, almancul une di chês di plastiche, che si sglonfin. Diferent che intal Staiar, là che ancje in graciis des ripresis cul avion si cognòs il numar precîs di pissinis intal viert (48.328!), in Carinzie a mancjin numars sigûrs, ancje a nivel comunâl. Il motîf: in Carinzie, par fâ une pissine al covente un benstâ ae costruzion dome se e je plui grande di 80 metris cubics, biel che par chês plui piçulis e covente dome une denunzie, e duncje no stan dentri intes statistichis.
◆ Si inacuarzisi dal impat di chestis propit sul imprin dal Istât, cuant che i consums di aghe a cressin fûr di misure par jemplâlis e par sborfâ cjamps e zardins. Si trate di une incressite di consum di aghe dal 40% in confront a altris dadis dal an. Stant ai dirigjents dai acuedots de Carinzie, chest nol sarès un fastidi par vie che lis risorsis di aghe a son avonde; pûr in cualchi comun si rive di misure, massime intai fins di setemane, cuant che al devente dificil mantignî il nivel des cistiernis.
◆ Dome intal comun di Maria Rain a son 200 pissinis su 2680 abitants, e ogni an si zontin di cinc a dîs, cence contâ chês fûr di tiere, che ogni an a incressin di 20-30 e che, ben clâr, non àn dibisugne di autorizazion. Tancj di lôr a volaressin jemplâ lis pissinis doprant i idrants, ma la societât des aghis no lu permet, par vie che il sisteme di furniment nol starès sù.
◆ Une des causis di cheste incressite e je dal sigûr la pandemie, che e à blocât la pussibilitât di viazâ, e par cuintri e à inviulât i invistiments pes cjasis, massime pes pissinis pai svagaments vie pal Istât. Par fortune – si fâs par dî – chest aument al ven intun ciert mût ridot des dificoltâts a cjatâ fûr i materiâi e dai timps luncs di consegne. Fin a 25 agns indaûr, in Carinzie a jerin dome doi che a furnivin chescj articui e la pissine e jere une robe rare, di siôrs. In dì di vuê, in graciis di profierts economichis, di discounts, di negozis par fâ di bessôi e soredut di Internet, tancj di plui a puedin permetisi une pissine, ancje se a restin inmò i furnidôrs di prodots di marche cun coscj che a son jenfri i 50 e i 80 mil euros. Dut câs, stant ai vendidôrs, cheste ande e scugnarà lâ in mancul intai agns cu vignaran, par vie che a deventaran plui alts i coscj di energjie, aghe e materiâi, e chest al vâl ancje pe cure continue dai implants. Si tratial alore di un bum in scjadince? Al è dificil di dî, vuê come vuê, ma o starìn a viodi. ❚