Un notiziari sperimentâl di 5-10 minûts paiât di sogjets istituzionâi furlans. heste e je la promesse fate dal Ministri pes comunicazions Paolo Gentiloni la delegazion furlane lade jù a Rome.
IL CONTRAT DI SERVIZI_Come che o ves let su lis nestris pagjinis doi mês za fa, l’ultin contrat Rai-Ministeri firmât in Avrîl al veve completamentri eludût la atuazion de leç 482/99 intal servizi radiotelevisîf public.
Chest no cate lis promessis fatis dal atuâl president dal Cda de Rai Claudio Petruccioli dal 2003, cuant che al jere President de Comission di Vigjilance RAI ae oposizion dal guvier Berlusconi: «O sostignarai ad implen ce che a domandin furlans. Il gno impegn al è totâl, si trate di garantî dirits fondamentâi stabilîts ar leç» al disè.
No je lade cussì, e daûr di cheste mancjance in Friûl si son inviadis lis protestis. Adiriture la Societât Filologjiche Furlane – par solit prudentone – e à vût declarât intun comunicât «Il contrat di servizi sotscrit dal ministri Gentiloni e dal president de Rai Petruccioli al è un insult aes minorancis linguistichis». Il comitât 482 vie par un comunicât al marcave che « nô furlans no vin chê di rinunziâ ai nestris dirits».
RIUNION A UDIN_In agjitazion ancje politiche e mont culturâl, tant che ai 16 di Avrîl, li de sede dal setemanâl diocesan «La Vita Cattolica», cul diretôr Gosgnac si davin dongje il Retôr de Universitât dal Friûl Honsell, il president de Provincie di Udin Strassoldo, il sindic di Udin Cecotti, il vicjari de Arcidiocesi bons. Gherbezza, il president de Arlef Fabbro, rapresentants dal Comitât 482 e di chel «Per il rilancio e l’autonomia del Friuli». A poiavin la iniziative ancje il president de Provincie i Pordenon De Anna e di Gurize Gherghetta.
Si decideve di inviâ un studi di avocats par lâ devant dal Tar contestant il contrat i servizi jenfri Rai e il ministeri des Comunicazions par violazion dal decret i atuazion (Dpr ai 2 mai 2001, n. 345) de leç 482/99 pe la tutele des minorancis linguistichis storichis. Passe cuasi un mês daspò si è sintude la vôs che i avocâts varessin dât parê che il provediment al veve mani par lâ indevant.
LA PROMESSE_Cumò a la metât di Jugn la propueste di Gentiloni fate ae delegazion – vuidade dal Retôr Honsell e componude dal assessôr Antonaz, al sindic Cecotti, dal rapresentant dal Comitât 482 Baracetti, dal rapresentant e Arcidiocesi bons. Corgnali cu la partecipazion dal president dal Confemili Domenico Morelli – e je di previodi in curt un incuintri li de sede Rai di Triest ar meti in vore «un gr radiofonic sperimentâl in lenghe furlane» dentri dal 2007. Lis risorsis finanziariis a vignaran metudis adun di ducj i sogjets istituzionâi cjapâts dentri.
______________________________________
LA SGRIFE
Cualchidun aial dubis che ai gjornaliscj de regjon no i coventi un biel cors di furlan? Intun GR (gjornâl radio) de Rai dal 28 di mai stât, l’agriturisim «il Mulin di Marchet» dongje Merêt di Tombe al è deventât il «Mulen de Marscè». Sì, lu an pronunciât propit cussì: ae francês! Pluitost che dî alc par furlan li di «RadioTrieste» a si inventin di dut!