Presentade la manifestazion dai 11 di Setembar pe fieste nazionâl de Catalogne: tai ultims agns e à fat simpri scjas. Ce che si fâs chest an

Ai 11 di Setembar dal 2013 a fâ notizie vie par ducj i media mondiâi e jere stade la cjadene umane di 400 km clamade La Via Catalana cap a la Independència (Vie Catalane fin ae Indipendence), inmaneade de Assemblea Nacional Catalana, une cjadene umane par scjavaçâ dute la catalogne dal Pertús fintremai Alcazar cuntune une partecipazion di sù par jù un milion e 600 mil personis, 500 mil di chestis inte aree di Barcelone.
L’an passât a Barcelone 1.800.000 personis a àn disegnât su doi dai viâi principâi de citât un grant “V” a strissis zalis e rossis (i colôrs de bandiere catalane) lunc undis chilometris e passe, cuntune impressionante dimostrazion di mobilitazion popolâr ma ancje di capacitât organizative.
Ogni an pe fieste de Indipendence catalane che e cole ai 11 di Setembar, si organize alc che al fâs scjas.
Cheste volte la iniziative, batiade Via Lliure a la República Catalana (Vie libare ae Republiche Catalane), si propon di jemplâ la Meridiana di Barcelone dal Parc de la Ciutadella fintremai vie Rosselló Pòrcel. Si trate di passe cinc chilometris di viâi che a saran dividûts in dîs sezions dedicadis ai temis principâi de mobilitazion pes elezions dai 27 di Setembar, viodudis tant che moment centrâl intal percors pe indipendence. Si fevele duncje di ecuilibri teritoriâl, diversitât, solidarietât, vierzidure al mont, sostenibilitât, avualiance, inovazion, rinovament democratic, educazion e culture, benstâ e justizie sociâl. Il colôr de mobilitazion di chest an al sarà il blanc, segnât però di piçulis frecis di cetancj colôrs che a compagnaran une grande frece che e mostre la strade pe libertât e che e corarà dilunc di dut il percors su lis mans de int, come une grande onde che e rivarà fin li dal Parlament catalan. Lis iscrizions dai volontaris a son tacadis dal mês di Lui. ❚ ✒ internazionalitari/LPdF