Sfuei Mensîl Furlan Indipendent
Archivi de Patrie

Piermario Ciani, psiconaute

Pauli Cantarut

Fabricâ imagjins, creâ situazions fantastichis, moltiplicâ lis identitâts e inventâ monts paralêi a son stadis lis ativitâts preferidis di Piermario Ciani. Interessât plui ai fenomens comunicatîfs che no a la classiche piture su tele, se ben che tai agns ’70 al fos nassût artistichementri tant che pitôr “optical”, Piermario Ciani al à fat tantis di chês robis che al è dificil ricuardâlis dutis.
Tai agns ’70 al è stât un dai fondadôrs de Librera, il prin locâl/librarie alternâtif o cuintriculturâl di Udin. Fra i ’70 e i ’80 al è stât un dai nons di ponte de mail art (une sorte di rêt artistiche mondiâl prime dal web che e viaze cu la pueste normâl) e si jere fat cognossi a nivel internazionâl cui ritrats fotografics (xerografiis), tratâts cu lis primis fotocopiadoris a colôrs, dai zovins “naonians”, ven a stâi dai musiciscj e dai fans dal Great Complotto di Pordenon. Fotografiis “new wave” che a someavin rivâ di New York e invezit a jerin fatis tes cjasis bandonadis o tai cessos dai locâi di Pordenon. Simpri in chei agns al à fondât insieme al critic musicâl Vittore Baroni il grop transartistic Trax, che traviers une schirie di oparis “falsis” al meteve in lûs la mistificazion de informazion uficiâl e si interogave sul confin tra veretât e falsitât, te art e no dome te art. Si pues ricuardâ la creature di Piermario Mind Invaders, un grup musicâl fantasime, che nol esisteve ma che al faseve discs e al vignive recensît. I agns ’90 a son chei di Stickerman e dai adesîfs che a àn jemplât Vignesie, intant de Bienâl di Art Contemporanie, e altris citâts cun frasis gjavadis dal lôr contest intune operazion di “detournement” tipichementri situazioniste, e de creazion di Luther Blissett, un non coletîf che ducj a podevin doprâ par azions che a imberdeavin i mecanisims de comunicazion uficiâl. Di chel grop e di chê estetiche artistiche
al è saltât fûr ancje il grup leterari Wu Ming, autôr di libris di sucès come “Q” e “54”. E Piermario al à dât une muse a Luther Blissett.
Si viodeve dapardut: libris, adesîfs, articui, ma no corispuindeve
a di nissun, di fat le veve fate doprant voi, bocje, nas e cjavei
di personis difarentis. Al è naturâl che Luther Blissett al petàs un dai siei colps mediatics ancje in Friûl, cussì intune trasmission di Onde Furlane dal ’96 e vignì lançade la notizie false de disparizion di un artist inglês che al jere in vore a fâ il zîr de Europe in biciclete par scrivi, cul traçât dal so percors, la peraule “ART”. La notizie e finî su la prime pagjine dal Messaggero Veneto e su lis locandinis dal stes gjornâl esponudis tes ediculis di dut il Friûl. Par fin “Chi l’ha visto” e veve mandât une troupe in Friûl e une altre a Londre a cirî lis olmis dal fantomatic artist. Purtrop, juste la zornade prime che la trasmission e les in onde su la RAI, un gjornalist furlan spion al à svuedât il sac mandant dut a mont. Pecjât… ma distès la performance, ancje se no complete, e à fat une grant clamôr. Tal ’96 al è jessût il prin libri de sô cjase editore “AAA edizioni” e par un trop di agns Ciani al à publicât une schirie di libris che si fâs fature a colocâ. “Totò, Peppino e la guerra psichica”, firmât di Luther Blissett e ristampât in seguit de Einaudi, si pues considerâ la prime prove di Wu Ming. E dopo tancj altris libris cun cuviertinis bielissimis su svareâts argoments: mail art, editorie trash, moviments artistics, politics e subculturâi. Libris sperimentâi o di artist come “La morte del libro”, un libri cu lis pagjinis dutis blancjis, copadis di un colp di pistole che lis sbusave fûr par fûr, o pûr il zâl titulât “Tre Allegri Ragazzi Morti”, cu la cuviertine di Davide Toffolo che e faseve la parodie di chês dai zâi Mondadori, e lis pagjinis vuedis e dutis zalis. Di dutis chestis operazions Piermario al sparniçave esemplârs a plenis mans ator par dut. Ancje jo, che lu viodevi ogni tant, mi ricjati a cjase un scafâl de librarie plen di robis sôs. Sono oparis di Art (cu la A maiuscole)? No lu sai, definîlis al vûl dî deventâ compliçs di un anacronisim che al torne util a la élite dai critics che a determinin cuâl che al à di jessi il gust dominant.
Dal sigûr al à vivût la sô vite tant che une opare di art, parcè che in dut ce che al à fat al à metût il dêt in cheste plaie, tacant de afermazion: “ARTE e je dome une peraule di cuatri letaris” e traviarsant dutis lis strategjiis e lis formis di produzion che al à adotât, miscliçant in maniere istintive e spontanie media difarents cun modalitâts operativis origjinâls: la modularitât (oparis viertis e variabilis), il networking (la interativitât e la reversibilitât dai rûi jenfri operadôr e spetadôr), la creazion coletive e tant altri. La sô produzion no somee a Bertiûl, il so paîs, e nancje ai noiôs cjamps di blave che a son ator ator, no somee nancje a la buteghe e al for di pan de sô famee, o forsit sì parcè che il sium de provincie profonde al burìs fûr mostris mutants, al metabolize e al estremize i stimui lontans trasformantju in mîts, in chimeris. Piermario al à anticipât manierisims, pornografiis, filosofiis e strategjiis de art contemporanie, vivint la sô vite in Friûl, colaborant ancje cul furlanisim rivoluzionari e planetari dai agns ’90 (sô la bielissime grafiche dal ultin numar di Usmis, tal ’95) e fasint di pari a une schirie di zovins artiscj che in dì di vuê lu ricuardin cun amirazion e rispiet. Masse indenant, masse fûr dai schemis codificâts, forsit par chest lis istituzions museâls furlanis no i àn mai dedicât une mostre uficiâl e, sul grant catalic “Le arti a Udine nel ‘900” (Marsilio, 2000) su di lui si puedin cjatâ juste cuatri riis. E pensâ che al jere a stâ a cuatri pas de Vile Manin.

––––––––––––––––––––––––––––––––––––––––––
A àn dite di lui:
Vittore Baroni (critic musicâl, redatôr e riviste Rumore)
Se lui invezit di curâ progjets coletîfs e situazioniscj come TRAX, si fos dedicât a la fotografie o a la grafiche cumò o saressin chi a fevelâ di un artist storicizât. Ma al contrari lui al à simpri crodût te culture di rêt pluitost che te figure dal artist individuâl, sierât te sô tor. Il progjet TRAX al veve coinvolt passe 500 artiscj, une famee slargjade par dut il mont che Piermario al è stât il pari. La sô cjase-archivi di Bertiûl, tal mieç de campagne furlane, e someave pardabon il centri dal mont.
Paola Bristot (critiche d’art)
La sô concezion de art e jere leade soredut a la indagjine des strategjiis di comunicazion dal messaç artistic. Forsit par chest al jere cognossût plui tal ambit internazionâl che no ta chel locâl. Cun di plui la sô preference pes modalitâts e pai lûcs no istituzionâi no lu à dal sigûr judât cu la critiche uficiâl. Ma distès la sô presince su la sene e je stade fuartissime, ancje pai zovins che lui al sburtave continuementri a jentrâ tal dificil mont de art in maniere ironiche e divertide ma no disimpegnade, anzit al jere un rivoluzionari e in dute la sô opare si cjatin riferiments al dadaisim e al situazionisim.
Davide Toffolo (musicist e fumetist)
Cuant che lu ai cognossût o jeri un canai e mi à gambiât la vite. Al jere un dai prins vêrs artiscj che o cognossevi e viodi une persone che e veve cheste passion pal so lavôr artistic e par une vite imbumbide di art mi à segnât par simpri. O pensi propri di sedi in debit cun lui. Mi visi che cuant che o vin fat il libri zâl dai Tre Allegri Ragazzi Morti, cu lis pagjinis vuedis e zalis, i librârs lu clamavin par che al ritiràs il libri, crodint che al fos un fal di stampe. Une volte mi à fat viodi une foto, fate tai agns ’70, dulà che al jere cun Allen Ginsberg che al veve invidât a Udin! No me soi mai dismenteade parcè che e jere la esemplificazion di cemût che al jere lui.
Roberto Bui (Wu Ming 1)
Insieme a Piermario o vin puartât indenant il progjet Luther Blissett par cinc agns. Al è stât une sorte di sintesi di dutis lis esperiencis che TRAX e veve lançât tai agns precedents. Mi ricuardi in particolâr la nestre ultime colaborazion pe mostre “Sentieri interrotti”, a Bassan, su lis avanguardis dal ‘900. Lui al veve fat une strissule lungje diviers metris, un grant cut-up cun ducj i articui dai gjornâl che a nomenavin Luther Blissett. La strissule e zirave su ducj i cuatri mûrs de stanzie e, seguintle, il spetadôr al podeve rindisi cont de evoluzion che i media a vevin frontât chest câs di interference comunicative. Al reste di capî ce fâ di dut chel che Piermario nus à lassât: oparis, stimui, pratichis. Une domande che jo e ducj chei che lu àn cognossût si fasìn dispès.
Apuntaments su Piermario
Piermario Ciani al sarà ricuardât cun doi videos a Topolò – il paisut des Vals che ogni an al devente centri artistic – tes zornadis di sabide e domenie 7/8 di Lui. Piermario («Pierma» pai siei, tancj, amîs) al è stât nomenât «diretôr» dal fantomatic ufici postâl di Topolò.
CYANOGRAPHICSISTERS FUN PRODUCTIONS (Emanuela Biancuzzi – Debora Vrizzi) Pierma, interpretât dai siei dissepui si descrîs, al conte dai siei viaçs imagjinaris. Videos li che 10 o 15 personis diversis si «travestissin» di Pierma – cu la barbete, la maie rosse di FUN e la panze – e «a testimonein» contantlu. Ogni persone ritrate e fasarà riferiment a une peculiaritât di Piermario, chê che plui le à impressionade, ancje te semplicitât di un gjest.
ZIA BEPPINA 4FUN (Emanuela Biancuzzi – Dorino Minigutti) Videos li che Zia Beppina – la lenghe lungje dal ufici postâl – e disvele ricuarts, vizis e virtûts de infanzie dorade dal Diretôr.
Lunis ai 9 di Lui si podarà ancje viodi l’intervent di mail art ospitât tal ufici postâl di Topolò li che Ciani al è diretôr.
Uan Fun Project: LETARIS AL DIRETÔR Cul contribût di Mail Art Network – artiscj, grafics, ilustradôrs, fotografs di nazionalitâts diviersis – al sarà componût/alestît/gjestît l’ufici dal Diretôr Piermario Ciani (clarementri cence che lu sepi).
IN VIDEO SU LA RÊT
Su internet li dal sît di videos YouTube (www.youtube.com), al è pussibil viodi Piermario Ciani filmât. Ae direzion  “http://www.youtube.com/results?search_query=piermario+ciani&search=Search”, di fat, a son trê estrats dal DVD «Piermario Ciani. Oltre la fotografia» realizât dai arlêfs dal Istitût di art «Sello» di Udin su progjet di Walter Criscuoli. Il video al è dal Dicembar 2005, pôcs mês prime de sô muart.

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +