Tal centenari de muart di Pier Pauli Pasolini o ripuartìn a tocs la tierce part dal libri scrit di Antoni Beline tal 1993 ‘Trilogjie tormentade’, che e rivuarde propit il poete di Cjasarse
I. RISPIETÂ IL MISTERI DAL OM
La sience plui dificile e je la cognossince di se stes. E se al è grivi cognossi se stes, imagjinâsi dome ce imprese dure che e je cirî di cognossi chei altris, ancje chei che, pûr vivint dongje di nô, no pierdin la lôr part di misteri. Robe che e capite ancje fra gjenitôrs e fîs. Di chi si pò fâsi une idee di trop problematic ch’al pò jessi il tentatîf di capî un om jessût za di vincj agns de sene de nestre storie, un om che al à passade la plui part de sô vite, par altri nancje tant lungje, su la sene leterarie e artistiche, di chê art cinematografiche che e je par definizion une fiction, une finzion, une recite.
Fra demonizazion e canonizazion
Cuant che chest om al à non Pier Pauli Pasolini, alore l’aventure si tramude in riscjo. Parcè che masse complès il personagjo e masse complesse e contraditorie la sô vore.
◆ Fin ai 2 di novembar dal 1975, dì dai muarts e de muart di Pier Pauli, cui podevial riscjâsi, soredut fra i benpensants, di dâ un judizi che nol fos di esecrazion e di condane? Dopo d’in chê dì, in cheste patetiche ricercje di erois trapassâts che e puedi in cualchi mût consolânus e rimediâ a la sterilitât dal nestri timp, cui puedial permetisi une cualchi riserve, un judizi ancje parzialmentri negatîf su Pasolini?
◆ Par lui, jenfri la canonizazion e la danazion, non datur tertium. Al è il destin des grandis personalitâts, grandis tes virtûts e tai difiets, di no lassâ spazi a la neutralitât. Chest al vâl par don Milani e par tancj altris, scomuts pai amîs e pai nemîs, dificii di imitâ e di classificâ. Al è sucedût, tune dimension une vore plui alte, pal grant enigme de storie, pal om Crist Jesù, che nô cristians lu adorìn come Fi di Diu. Di lui, par prin, al è stât dit che al sarès stât “ruvine o resurezion”, “segnâl di contradizion” (Lc 2, 34).
◆ Za chest nus fâs capî la pericolositât di certis operazions che a assolvin o a condanin in toto il personagjo e il so mes ancjemò prime di vierzi la discussion. Ogni pre-judizi al è in sostance une violence e une falsetât, parcè che il Vanzeli cun grande sapience nus improibìs di judicâ e di condanâ e parcè che l’om al va pesât inte globalitât des sôs voris e inte veretât dal so mes, lassant simpri grant spazi a la pietas, a chel rispiet e discrezion che si à di vê tai confronts dal misteri di Diu e dal misteri, no mancul grant e golôs, di ogni om.
◆ Par une reazion comprensibil a la damnatio memoriae ch’al è stât condanât il nestri paisan, e podarès saltâ fûr une pice no mancul negative di esaltazion, che ti inibìs di viodi i limits de liende artistiche e umane di Pasolini, che ind è, come che la tesi contrarie e inibive di viodi i valôrs, che ind jere ancje di chei e no pôcs. Se pai prins Pasolini nol podeve vê virtûts, pai seconts nol podeve e nol pò vê difiets.
Un profete, ancje se fûr des regulis canonichis
Lassant alore a Diu, se o crodìn, il compit di stazâ il troi che chest so famei al à fat in vite, e rinunciant a certis iperbolichis e gratuidis definizions de sô vore, come “la plui impuartante operazion culturâl de storie dal Friûl” o ben “l’unic che al à savût capî la cuistion furlane inte sô essence e inte sô colocazion juste” o ancje l’atribuzion di un caratar sacrificâl e dibot cosmic a la sô muart, mi semee plui just fermâmi sul soiâr de sô anime e meti a fûc il so mes, par capî la validitât e la perenitât dai stimui, des intuizions e des premonizions, che a fasin di lui un profete, magari fûr des regulis canonichis.
◆ Che Pasolini al vedi vude cheste cjarie profetiche si lu capìs partint de acezion tradizionâl di chest tiermin.. ❚