Piçul ma grant di contignûts: il gnûf Museu Langobart di Romans dal Lusinç

Al è un piçul Museu Archeologjic, ma cetant curât e moderni te concezion e te esposizion: e al fâs capî de storie dai Langobarts cetant di plui che tantis altris racueltis magari plui innomenadis, ma tant plui sclagnis par cure e clarece di ilustrazion. O stin fevelant dal Museu che al è stât viert prin di Nadâl a Romans dal Lusinç, dulà che olmis impuartantis lassadis sul teritori dai dissendents di Alboin a son vignudis fûr tal 1986. Une spade antighe e jere saltade fûr de tiere intun cjamp di Sant Zorç (toponim di clare divignince langobarde) e daûr di jê a jerin stadis scuviertis une vore di fuessis. Di in chê volte, lis ricercjis no son mai ladis al mancul: a son tornadis a lûs 300 tombis, une necropoli interie che i à puartât in dote al Comun di Romans e ae comunitât locâl un patrimoni storic di grande valence. Pecjât dâlu vie a Museus plui grancj dulà che al sarès stât pôc valorizât .
Par chest intal timp lis diviersis aministrazions a àn realizât mostris temporaniis che a son coventadis a mostrâ cetant interès che e stice la storie de Alte Ete di Mieç in Friûl. E il Comun ae fin al à metût dongje un biel Museu in trê sezions, une plui biele e interessante di chê altre. La prime e rivuarde i vuerîrs di Sant Zorç, che a àn lassât scûts e curtìs, armis e spadis za in part esponudis intune mostre dal 2007. La seconde e mostre il corêt des feminis di alt nivel sociâl, probabilmentri lis mari e lis feminis dai soldâts soterâts li dongje, cu lis lôr zoiis e lis fibulis a stafe che a son tipichis di chel periodi. La part plui resinte e plui di efiet e je dut câs chê relative ae esposizion dal corêt di Adelinda, une frute piçule che e je stade soterade con manufats une vore preziôs. Contant la storie di cheste picinine, il Museu si sfuarce – con sucès – di deventâ ancje a misure di frut. Cheste fantacine de fare di Romans (la fare al è il prin nuclei de organizazion longobarde: un grup di fameis, n.d.r.) e torne a fevelâ ai fruts de sô stesse etât. E lu fâs dopo 13 secui …
La sô storie par sigûr e fâs vignî voie di lâ ancje a visitâ il Parc Didatic Archeologjic viert tal 2013 inte part a nord de necropoli. Alì, i sgjâfs a àn riveladis fuessis metudis in paralêl, orientadis di soreli jevât a soreli a mont. La impuartance des tombis dai vuerîrs di sclibe antighe si viôt dal fat che a jerin sormontadis di une struture a capane. Dôs fuessis didatichis a fasin provâ la esperience dal sgjâf e a permetin di rindi concrets i laboratoris cui zovins. La aleance cun dôs associazions (I Scussons e Invicti Lupi) e permet di proponi pachets turistics complets: visite al museu, lezions di storie e tradizions langobardis, laboratoris didatics, dimostrazions su lis usancis de fare, esibizions e combatiments.
Une biele sodisfazion par chei come Michele Calligaris, vicesindic di Romans, che a àn simpri crodût che cheste ereditât e fos in ogni maniere di valorizâ. E ancje pal sindic Davide Furlan e pe assessore ae culture Alessia Tortolo, che a àn podût screâ un Museu pardabon speciâl. A proposit: intun Comun che al à un sindic Furlan di non e di fat, magari si podarès zontâ alc in marilenghe ancje intai biei percors dal Museu. No saressie une biele idee?
✒ Walter Tomada