La associazion furlane e augure un bon Nadâl
cui aniversaris di personaçs furlans
La associazion Itineraria dal Friûl-Vignesie Julie, une realtât uniche tal so gjenar, promotore e divulgadore dal patrimoni storic e artistic siôr dal nestri teritori midiant di tantis ativitâts tra studis, cunvignis, publicazions, visitis vuidadis, festivai e rassegnis, e prepare il Nadâl furlan cuntun omaç a diviersis personalitâts de art che a vignaran festezadis tal an che al ven.
◆ La presidente de associazion, la storiche de art Maria Paola Frattolin, e à organizât un incuintri insiemi cuntune altre impuartante storiche de art, Liliana Cargnelutti, intai spazis de Fondazion Friûl, par augurâ in non de associazion une preparazion al bon Nadâl, e par anunziâ lis personalitâts culturâls che l’ent al vûl memoreâ tal 2026, cun diviersis iniziativis.
◆ Inovâi cun cifre taronde, e insiemi al pitôr inglês John Constable, ai 250 agns de nassite, a Carlo Collodi, il pari di Pinocchio par intindisi, ai 200 de nassite, a vegnin fûr altris ecelencis che al merete ricuardâ, ma che dispès a sbrissin in dismentee. Tra chescj il pitôr veronês, ma atîf ancje in Friûl, Maffeo Verona, ai 450 de nassite, autôr di diviersis palis di altâr a Udin, come chê che e presente la Vergjine tal templi, o il Sposalizi de Vergjine e la muart di Sant Josef. Un altri di festezâ al è Pietro Nobile, ai 250 de nassite, architet neoclassic nassût tal Cjanton Ticin ma trasferît di zovin a Triest, indulà che tra l’altri al à contribuît ae discuvierte dal Teatri Roman e fat intervents tal Cjistiel di Sant Just; atîf ancje a Aquilee e Gurize par diviersis infrastruturis e rilêfs monumentâi. Un altri al è Luduì Manin, ai 300 de nassite, ultin dôs di Vignesie e il so leam cul Friûl al passe soredut par Vile Manin di Passarian, indulà che tra l’altri si è consumade la liende leade al Tratât di Cjampfuarmit dal 1797.
◆ Furlans doc a son invezit chei altris trê personaçs che Itineraria e à cûr di ricuardâ cul an che al ven. La prime in ordin di nassite e je Aloisa Mantica, ai 550 agns de nassite, femine nobile e mecenat, membri dal cenacul dai Mantica in Contrade Mezane, e je une des figuris femininis plui interessantis di Pordenon tal Rinassiment. E je stade jê, par esempli, a volê la capele di Montereâl-Mantica tal Domo di Sant Marc, frescjade di Giovanni Maria Zaffoni, clamât il Calderari, che e conte lis storiis de Vierte cuntun lengaç dongje al manierisim.
◆ 200 agns de nassite par Gian Domenico Facchina, nassût a Secuals, dulà che al impare lis primis nozions dal mistîr di mosaicist prime di trasferîsi a Triest a disesiet agns, là che al lavore al restaur dai mosaics de catedrâl di Sant Just: une esperience decisive che lu met in contat cu la grande tradizion musive adriatiche. Po al passe a Vignesie e al colabore ai mosaics di Sant Marc, e daspò al è a Parîs dulà che al devente il mosaicist plui celebri dal Votcent e al codifiche il mosaic moderni. Il Friûl i rint omaç cu la Scuele dai Mosaiciscj dal Friûl e cul Premi Gian Domenico Facchina promovût dal Comun di Secuals. La sô cjase di nassite, decorade a mosaic, e je ancje jê un piçul manifest de art che i à dât innomine intal mont.
◆ Ultin, ma no sigûr par impuartance, al è Ettore Gilberti, ai 150 agns de nassite. Lui, un dai interpretis plui origjinâi de architeture furlane tra Votcent e Nûfcent. Nassût a Udin, formât al Politecnic di Milan cun Camillo Boito, al torne besvelt inte sô citât, dulà che al devente l’inzegnîr architet di riferiment pe borghesie e pes istituzions locâls. La sô furlanetât si lei tes oparis che a tornin a dissegnâ il centri urban di Udin: dal liberty di Palaç Gilberti, dongje Puarte Vilalte, ae monumentâl sede de Casse di Sparagn, fint al ex cine teatri Odeon in vie Gorghi, ultin lavôr e manifest di un lengaç mai tant origjinâl, sede che inmò cumò no cjate une destinazion di ûs degne. Cuissà ce che e sarà di jê.
◆ La ativitât di Gilberti si slargje al teritori regjonâl, cun edificis industriâi, cjasis popolârs, architeturis di servizi. Un progjetist e pensadôr cence simii, inlidrisât in Friûl, che nus à lassât in ereditât un paisaç che ancjemò vuê al conte de identitât furlane.
◆ Al è a chestis Mestris e chescj Mestris che Itineraria ur dediche lis ativitâts pal 2026. Dongje dal “Festival dai Tiepolo”, l’ent al puarte indevant ciclis tematics leâts aes grandis ricorencis dal calendari furlan, come che si è capît ben. Tal trieni plui resint la associazion e à ancje consolidât il dialic cun scuelis, liceus e conservatoris, promovint percors formatîfs che a metin dongje art, laboratoris, leturis e musiche, in continuitât cun progjets come “Itineraria Antiqua et Nova” dentri di “UdinEstate”. Itineraria si conferme cussì une regjie culturâl buine di tignî adun ricercje e divulgazion di cualitât, costruint rêts tra istituzions e teritoris e trasformant, dì dopo dì, il paisaç de nestre tiere intune esperience di cognossince vive e partecipade, come che e à fat chest Autun cul progjet Vilis Viertis. Une realtât di seguî, dutis lis informazions sul so cont si cjatin sul sît www.itinerariafvg.it e su lis pagjinis social. ❚
