Sfuei Mensîl Furlan Indipendent
Archivi de Patrie

Parons vecjos e gnûfs de informazion

A i 24 di Mai dal 1946, juste trê mês dopo che pre Bepo Marchet e Felix Marchi a vevin fondade “La Patrie dal Friûl”, un grup di industriâi triestins al à screât a Udin un gjornâl cuotidian clamantlu “Messaggero Veneto”. In chê volte Carlo Tigoli, il diretôr, e ducj chei che lu àn finanziât, a vevin reson di clamâlu cussì parcè che il Friûl nol esisteve. Dute la regjon e jere part de cussì clamade Venezia Euganea che e cjapave dentri il Venit cu la sô otave provincie, chê di Udin (cun dentri Pordenon). E a lôr, pardabon, ur leve ben cussì. A chei de “Patrie”, invezit, i coventave di mostrâ che un popul che al à une lenghe e une divignince milenarie, e che al varès meretât chel autoguvier che al è scrit inte sô storie.
◆ Tancj cambiaments a son stâts intai agns: la “Patrie” e à vude une storie tormentade, ma e je simpri stade une vôs bastiancontrarie cuntun sôl paron, la int furlane che no si rint ae pierdite de sô identitât. Il cuotidian furlan plui vendût al à vût proprietâts diferentis, simpri leadis al mont industriâl. Di Zanussi a Melzi, de Confindustrie al Grup Debenedetti, al è simpri stât in mans di int che e fâs riferiment al mont de industrie. La logjiche di riferiment, dut câs, e je simpri stade chê furlane: almancul fin cumò.
◆ Za di cualchi an la storie e je cambiade, e i gjornâi di Udin e Triest a son deventâts dutun: ma cumò, 77 agns dopo de sô nassite, il “Messaggero” al sta par deventâ pardabon “Veneto”. Une schirie di industriâi e oms de finance dal Venit lu àn cjolt de GEDI, e chest al va a modificâ pardabon il panorame de informazion in regjon. Sì, parcè che inte Nord Est Multimedia che e controlarà i gjornâi “Il Mattino” di Padue, “La Tribuna” di Trevîs, “La Nuova Venezia”, “Corriere delle Alpi”, “Messaggero Veneto” e “Il Piccolo” al è un unic component furlan: Giampietro Benedetti, di simpri riferiment de Danieli. Pal grup di Buri no je une situazion gnove, stant che al à za lis mans impastanadis tal mont de informazion. Tal 2014 al à di fat cjolt dal grup Caltagirone lis testadis di Mediafriuli, ven a stâi Telefriuli e Il Friuli.
◆ Cuntune concentrazion in man a un sôl editôr di une cuote consistente de stampe cuotidiane, setemanâl e di une emitente televisive, la situazion de informazion furlane cemût si puedie definî? Nol è un monopoli, ma chês altris testadis a son dutis ugnulis: a part chês diocesanis, nissun altri “concentrament”. E je la television dal Udinês, e je Onde Furlane, o sin noaltris de “Patrie”. Ducj di bessôi. Po e je la Rai, ma se no son disgraciis la television di Stât no je buine di movisi di Triest.
◆ Chest piçul imperi informatîf isal un ben? Se al tignìs cont dal Friûl, se al fasès cressi la cussience e la braùre de nestre int, al sarès par sigûr alc di just. Ma il fat che il control dai cuotidians al sedi di un grup che al à il cjâf in Venit al mostre pardabon che la direzion di cheste operazion no ven di chenti. Al è un fat che cheste rivoluzion e rive intun moment dulà che la politiche e sburte par fânus deventâ ducj “efevugjins” o “friulvignesiejulians” scliçant lis identitâts internis de regjon, e dulà che la industrie e sburte par grandis operazions di trasformazion dal teritori che a àn bisugne di convinci la int che no somee masse entusiaste di realizâ implants produtîfs grandonons cence condivision. Une vôs sole no je mai un ben, nancje se e dîs robis justis. Ridusint il pluralisim no si semplifiche la vite di une societât, si le impuarìs e vonde. E jessi puars di informazion al è jessi mancul libars. Simpri. ❚

Lenghe minoritarie / FluxJudri25 – Giassico

Redazion
Conferece “Lingue minoritarie: le capitali della cultura e il rilancio del territorio” . A son intirvignûts Elena Gasparin, Dree Valcic president de Clape di Culture Patrie dal Friûl, Eros Cisillino president ARLeF, William Cisillino diretôr ARLeF, l’On. Guido Germano Pettarin e il coletif Lis Tarlupulis. FluxJudri25.Ca sot l’intervint di Valcic. lei di plui +

L’EDITORIÂL / Un Friûl disarmât

Walter Tomada
Lant ator pe Italie dispès al capite, cuant che si dîs di jessi furlans, di cjatâ int che nus dîs “Ah, mi visi dal Friûl! O ai fat il militâr a Udin!”. Prin dal taramot, un abitant su dîs chenti al jere un soldât e cheste ereditât di “tiere di primulis e casermis” se puartìn […] lei di plui +

Contile juste / Plebissît pustiç

Diego Navarria
“MMandi, nono.” “Mandi frut!” “Dai mo, nono, no soi un frut. O ai disenûf agns e o ai pene finît il liceu!” “Par me tu sarâs simpri un frut, il prin nevôt. Però e je vere, tu sês deventât grant, une anime lungje. Se tu cressis ancjemò tu varâs di sbassâti par jentrâ in cjase, […] lei di plui +

Presentazion / Presentazion dal libri “Fûc su Gurize”. Intal ambit dal Cors Pratic di Lenghe e Culture Furlane inmaneâtde Societât Filologjiche Furlane

Redazion
Joibe ai 17 di Avrîl dal 2025 aes sîs e mieze sore sere (18.30)SALE CONFERENCIS DE BIBLIOTECHE COMUNÂLVie Rome 10, Vile di Ruvigne / Via Roma 10, S.Giacomo di Ragogna A intervegnin: DIEGO NAVARRIA colaboradôr dal mensîl ‘La Patrie dal Friûl’e DREE ANDREA VALCIC president de Clape di Culture ‘Patrie dal Friûl’Jentrade libare lei di plui +

5 Par mil / DANUS UNE MAN

Redazion
5 PAR MIL – Ancje chest an, cu la declarazion dai redits tu puedis dâi une man a La Patrie dal Friûl, il mensîl dut in lenghe furlane dal 1946. Nol coste nuie, baste meti il numar 01299830305 te casele juste: Sostegn dal volontariât e des altris organizazions no lucratîvis di utilitât sociâl, des associazions […] lei di plui +