Par plasê, sintiment! Prime che il turisim al mueri scjafoiât

“Il timp e il cûl al fâs ce che al vûl”, e dîs une detule popolâr. E chest an, almancul il timp o savìn ce che al è daûr a fâ. Une stagjon strambe che e je daûr a meti in prove in maniere serie la sorevivence dal turisim in regjon. Dai mârs aes monts, tra i operadôrs al è dut un lamentâsi: Lignan al fâs i conts cun presincis sdrumadis, a Fors di Sore – robe mai viodude – un albierc al siere in plene stagjon. E in dut chest, esponents de Zonte regjonâl che a anunziin che a vuelin fâ di Triest l’hub dal turisim regjonâl.
Ce sucedial? Intant, fevelìnsi clâr, la crisi dal turisim in Friûl-VJ e pues jessi sì influençade – e ancje in maniere pesante, se o volìn – dal timp crût. Ma no je dal sigûr la uniche reson, se o considerìn che (e a son dâts Istat) lis presincis dai turiscj talians a son caladis dal 23% dal 2010 al 2013, cuntun crac dal 18,5% dome l’an passât; la medie des gnots passadis in struturis ricetivis e je passade di 4,3 a 3,8 e si pues consolâsi dome regjistrant che in totâl i turiscj talians e forescj rivâts tai agns considerâts, al cres dal 3% e che, propit grazie ai forescj, la diminuzion complessive des gnots gnots passadis in struturis ricetivis dal 2010 al 2013 e à segnade une flession “dome” dal 9,5% (-10,9% l’an passât).
Ma si trate di presincis simpri di plui di scjampon; e che, a limitâ i dams, a sedin soredut i forescj, al è dimostrât di une altre indagjin Istat, chê su “I viaçs dai talians”, che e dîs che la capacitât dal Friûl-VJ di tirâ dongje int sul marcjât interni si sarès adiriture smiezade: dal 2012 in dut a son rivâts di chês altris regjons mancul di un milion di turiscj cuintri i 2,1 milions dal 2008. Il dât – che al rivuarde ducj i gjenars di prenotazion par passâ la gnot – e je ancjemò plui grivie se si considere che su lis vacancis di passe cuatri gnots, la diminuzion e sarès adiriture dal 74%.
E chei che a patissin di plui a son lis grandis localitâts turistichis, il mâr in particolâr, che l’an passât al à regjistrât une flession des gnots tor dal 13%, cuintri il 5% di chês altris zonis. Cumò, al è clâr che il dât nol pues che jessi preocupant, in prospetive, ancje in tiermins di conseguencis economichis e ocupazionâls (pensait dome al efiet su dut l’indot e sul compart dal agroalimentâr, par esempli), soredut se si considere che il turisim regjonâl al è “fat” pai trê cuarts di Lignan e Grau: in sumis, il grues dai volums – e des jentradis – al ven des dôs localitâts marinis. Par chest al sune strani sintî a fevelâ di Triest tant che “hub” dal turisim regjonâl. Se ancje si ves voie di afidâsi a cualchi grande nâf di crosere in plui – e no si pues pensâ dal sigûr che Triest e podedi competi cun Vignesie e duncje fâ “dirotâ” cuissà ce trafics – i numars a saressin dut câs piçui. Il splendit isolament fat sù tor dal aeropuart di Roncjis di Monfalcon, fin cumò no bon di strenzi aleancis strategjichis cun altris realtâts, dal sigûr nol jude a clamâ dongje flus turistics: nol è paiant beçonons un colibrì piturât – ricognossût tant che “simbul dal Friûl-VJ” di ducj (?) – suntun avion di une compagnie taliane che si pues sperâ che i turiscj si fermaran cualchi gnot di plui. Al massim, si pues ispirâ che a scjampin ancje chei colibrîs restâts in zone…
Se no si pues ignorâ il pês di Grau e Lignan sul belanç turistic complessîf regjonâl – e al sarès il câs di sburtâ invistiments par miorâ e inovâ l’appeal di chestis localitâts e des lôr struturis ricetivis e no dome – al sarès forsit il câs di cjalâ in maniere serie aes potenzialitâts di un ambient eterogjeni e no simpri valorizât pal miôr. Pensait ae Lagune di Lignan e Maran, o a une mont masse dispès ignorade e bandonade al so destin (i boscs che si slargjin e a scjafoin i comuns a son un esempli emblematic); o a realtâts tant che Aquilee e Palme o ai “tesaurs” de enogastronomie regjonâl…
O sin plens di “hub”: baste dome volê valorizâju. Sigûr al è che se po – come che al è sucedût di resint – o penalizìn i turiscj forescj fasintjur multis saladis parcè che no àn fat il biliet dal tren parcè che lis stazions a son sieradis – sieradis, tignît presint –, ma i controlôrs a son inflessibii, beh, preparìnsi parcè che, cence un ninin di sintiment, nissun “hub” nol podarà mai judânus. ❚
Linux