Par no dismenteâ l’orcolat

Tra cualchi zornade al cole l’aniversari dal taramot. Ognidun di nô si visarà in forme divierse di chel 6 di Mai. Po dopo, a saran lis manifestazion publichis a ricuardâ la tragjedie e la ricostruzion. A saran une prove gjenerâl di ce che nus spiete il prossims an, cuant che a colaran i 40 agns dal Orcolat.
Ancjemò une volte, ma di sigûr cun plui borie, viodude la impuartance dal aniversari, i sorestants a fevelaran di rapuarts tra istituzions e ricostruzion, di solidarietât nazionâl, di “chel spirt che al coventarès cumò par dâi cuintri ae crisi”, une frasute che a doprin dispès tant Serracchiani che Tondo.
Peraulis par platâ chê che e je stade la vere fuarce par tirâsi fûr dal sdrumament: la unitât di popul e la sô determinazion a jessi protagonist de rinassite.
Plui a passin i agns, e plui al è clâr il dissen di sierâ la storie e la esperience dal taramot tal cjanton dal ricuart, une pagjine di lei di corse e cence fâ capî ce che al è scrit, soredut aes gnovis gjenerazions.
La ricete e je facile: dome un tic di retoriche, parcè che e pues deventâ pericolose, un grum di disinformazion cuinçade cun tantis clamadis ae responsabilitât, al jessi “democratichementri” sotans ai sorestants.
Un esempli par ducj: i sindics a son stâts di sigûr tra i protagoniscj de ricostruzion. Noaltris o zontìn che a àn podût jessi cussì daûr de pression de int, des assembleis di paîs, ma lassìn pierdi cumò e tornìn ai sindics dal taramot. Un esempli di rapuart just cu la Regjon, une deleghe che e à permetût di bati la burocrazie, di tornâ a fâ sù cjasis e fabrichis. Piçui comuns, tant che e je la nestre realtât furlane, ma grancj tal meti in vore un alc come che nissun altri in Italie e in Europe al jere rivât a fâ.
Vuê chel sisteme che ducj, apont a peraulis, a puartin tant che esempli, al ven strucjât de riforme dai ents locâi, dulà che la autonomie e ven sacrificade al centralisim e ae pseudologjiche dai numars.
O sin clârs fin insom: cun chest resonament, cun cheste ideologjie “razionaliste”, Vençon nol sarès stât ricostruît, dute le pedemontane nancje: lis ruspis a jerin bielzà prontis, e ancje lis cjartis topografichis, par puartâ dute la int tai gnûfs comprensoris de Pontebane.
Cence chê int che e disè di no, cumò al sarès un altri Friûl, anzit nol sarès plui.
Al à reson Belci, segretari regjonâl de Cgil, tal domandâ di istituî une zornade a ricuart dal taramot. Nol dîs la date.
Noaltris le savìn: il trê di Avrîl.
Pre Checo Placerean le veve sielzude tal 1977 par celebrâ, te zornade de nassite de Patrie dal Friûl, la rinassite dal popul furlan dopo il taramot.
Ven a stâi che ricuardâ il taramot, la ricostruzion, al è dutun cul ricognossi la fuarce identitarie di chel popul che sui siei cartei al scriveve: “Il Friûl nol sarà il Belice”. ❚
Redazion