Orchestre Naonis, une scuele di contaminazion musicâl

La Orchestre Naonis, e je une scuadre che e permet ai musiciscj di sperimentâ i diviers lengaçs musicâls a servizi des produzions dal teritori. O fevelìn di un dai tancj e impuartants progjets che a son sostignûts de Fondazione Friuli, e in chest câs ancje de Regjon che za di un pôc e à ricognossût il progjet trienâl inmaneât de Academie Naonis di Pordenon, ven a stâi la orchestre che e puarte il stes non e che e tire dongje almancul une trentine di musiciscj dal teritori regjonâl. «E je une iniziative continuative – al spieghe il diretôr artistic, il mestri Valter Sivilotti – che e permet a plui di 30 musiciscj che a rivin di diviersis bandis dal teritori di confrontâsi cun tantis tipologjiis di musiche, di chê di cjamare a une orchestre. Chest, su la fonde des necessitâts dai progjets che o puartìn indenant vie pal an». Une des produzions plui resintis de Orchestre Academie Musicâl Naonis e je il dvd “La sentinella della Patria”, in colaborazion cun Cinemazero e Glauco Venier, che e je stade presentade inte Istât 2021. Ma a son tantis ancje lis iniziativis une vore preseadis puartadis indenant tai ultins agns cun Remo Anzovino, cul festival “Il volo del jazz” o ancje inte suaze di “Vicino/lontano”, cul côr dal Friûl Vignesie Julie e Moni Ovadia, e ancje cul Mittelfest, sunant cun Tosca che e à cjantât par furlan. «O vin – al spieghe il mestri Sivilotti – un grup une vore preparât di musiciscj, in stât di distrigâsi cun tancj lengaçs e in diviers contescj. Chest progjet ur permet di confrontâsi cu lis diviersis situazions ma ancje di divulgâ la musiche produsude in regjon, sburtant su la creativitât dai sengui musiciscj. Al è un laboratori viert a ducj: cualchi volte a puedin jessi ancje pôcs sunadôrs, altris invezit ancje cualchi desene, su la fonde dal progjet che o vin di puartâ indenant». La Academie Musicâl Naonis di Pordenon e je stade fondade dal mestri Beniamino Gavasso trente agns indaûr, e vuê e je direzude dal mestri Valter Sivilotti: in ducj chescj agns si è fate notâ sedi sul plan regjonâl che su chel talian. La sô storie e testemonee un impegn costant tal proponi contaminazions virtuosis jenfri la produzion musicâl classiche, lis musichis dal mont e lis gnovis tindincis compositivis. ❚