O soi stât imbevût di culture furlane» Mandi Gianfranco Plenizio, mestri di musichis di cine

Il mês passât, ai 7 di Fevrâr, nus à lassâts un grant furlan de musiche e de cinematografie: Gianfranco Plenizio. Grant pianist, compositôr e diretôr di orchestre, famôs soredut pes sôs musichis di film, al à firmât cetantis colonis sonoris par regjiscj straordenaris, tant che Billy Wilder, Federico Fellini, Mario Monicelli, Ettore Scola, Ermanno Olmi, Luigi Comencini, Dario Argento, Dino Risi e diviers altris. Nassût a Sant Laurinç di Sedean ai 10 di Zenâr dal 1941, daspò i studis al Conservatori di Udin cun Enrico De Angelis Valentinis, al à scomençât a viazâ, studiant cun composidôrs di grande fame, tant che Luigi Dallapiccola, Bruno Maderna, Hermann Scherchen, cjatant a Rome la sô patrie adotive, cence mai dismenteâ il Friûl. Plui di trente films, passe 250 direzions di orchestre, tante musiche sinfoniche, vocâl, di cjamare e libris, indulà che al à volût rinovâ par esempli il patrimoni de vocalitât taliane dal Votcent, ma ancje contâ storiis leadis ae musiche, ae musicologjie, aes tecnichis di composizion, tant che al jere espert. E une publicazion cun protagonist il Friûl, cetant curiose, jessude tal 2014.
Si intitule Philò e altre storie del Friuli, indulà che Plenizio al à volût contâ diviersis storiis, cronichis, aventuris, che lu lein ae Patrie e al so paîs di nassite. Come che al veve dit intune interviste pal Messaggero Veneto: «Ancje se al è tant timp che o vîf lontan dal Friûl, o soi stât imbevût di culture furlane. I dêf cetant. Par me al reste un leam insostituibil».
Un Friûl di altris timps, scrit no par moralisim, ma par contâ cualchi piçule curiositât popolâr. Fruçons, al veve clamât chestis contis, indulà che al ven fûr ancje il personaç Filò, une Édit Piaf denant trat, une paisane dal mestri Plenizio che i plaseve cetant cjantâ. Storiis, che a van dal 1860 a cent agns dopo. Memoriis dal autôr che il Friûl al ringracie e nol dismentee.
✒ Alessio Screm