Numars di gale par Friuli Storia, premi model cun 550 jurâts

I servizis segrets, la storie de lote politiche e la aleance jenfri la Gjermanie naziste e la Russie sovietiche: a son chescj i temis dai trê libris finaliscj de novesime edizion dal premi “Friuli Storia” sostignût de Fondazione Friuli. I trê volums a son chei di Gianluca Falanga, La diplomazia oscura. Servizi segreti e terrorismo nella Guerra Fredda (Carocci, 2021), Paolo Macry, Storie di fuoco. Patrioti, militanti, terroristi (Marsilio, 2021), e Claudia Weber, Il patto. Stalin, Hitler e la storia di un’alleanza mortale. 1939-1941 (Einaudi, 2021). A selezionâju e je stade la jurie sientifiche che e met adun Elena Aga Rossi, Roberto Chiarini, Ernesto Galli della Loggia, Ilaria Pavan, Paolo Pezzino, Tommaso Piffer, Silvio Pons, Andrea Possieri e Andrea Zannini. Chest an a saran 550 i letôrs che a decidaran cui che al sarà il vincidôr. Il premi, di fat, al ven assegnât in dôs fasis: dopo de selezion de jurie sientifiche, lis trê oparis a son sometudis al judizi di personis no espertis, che ur vegnin mandâts i trê libris e che a varan timp fin ae fin di Avost par stabilî cui che al à di vinci, votant online. La premiazion si fasarà a Udin ai 6 di Setembar.
◆ Il premi al è cressût une vore, viodût che dopo de sperimentazion dal an passât a son 10 i Comuns che a partecipin, ven a stâi Aquilee, Cjassà, Cjons, Montenârs, Palme, Pavie, Purcie, Ruvigne, Tresesin e Udin: i letôrs des lôr bibliotechis, par un totâl di 100 di lôr, a cjaparan part ae jurie popolâr che e decrete il vincidôr. A chescj si zontin 50 puescj risiervâts ai students de Universitât dal Friûl. Dongje di chest si à domandât a ducj i universitaris dal Ateneu furlan di partecipâ tant che letôrs e la rispueste e je stade straordenarie, stant che si son fatis indenant 100 candidaturis. Su la fonde di chest, la associazion Friuli Storia e à slargjât inmò di plui il spazi de jurie cjapant ducj i students candidâts.
◆ Il premi al previôt ancje un ricognossiment aes scuelis secondariis di secont grât des ex provinciis di Udin e Pordenon clamadis a indagâ la storie dal Friûl cun elaborâts scrits e multimediâi. Chest an a son stadis coinvoltis in vie sperimentâl ancje trê scuelis mezanis di Udin, ven a stâi la Bellavitis, l’istitût salesian Bearzi e l’educandât statâl Ucellis. Lis candidaturis si son a sieradis e i vincidôrs si savaran in Autun. «Cun Friuli Storia – al à dit Giuseppe Morandini, president de Fondazione Friuli – o vin decidût di slargjâ il premi aes scuelis mezanis. La fondazion e à simpri crodût in chest premi e o sin contents di lâ indenant cun cheste aventure». Ae presentazion de edizion 2022 dal premi a son intervignûts ancje il sindic di Udin Pietro Fontanini, la assessore regionâl Tiziana Gibelli, il retôr de Universitât Roberto Pinton, il president di Anci F-VJ Dorino Favot, il president de Bancje di Credit Cooperatîf di Udin Lorienzo Sirch, e Gabriele Marini di Poste Italiane. Il premi “Friuli Storia” al ven realizât cul contribût de Regjon, de Fondazione Friuli, dal Comun di Udin, di Poste Italiane e de Bancje di Udin. ❚