Interviste a Anna Romanini e Mauro Urli, aministradôrs di un dai grups plui vivarôs de rêt

Ai 11 di Otubar dal 2017, Anna Romanini e Mauro Urli a davin vite a un grup Facebook clamât “Achì, si scrîf e si rît NOME par furlan (e par cjargnel)!”, cun chê di puartâ indenant la lenghe furlane ancje sui social e di tignî dongje i furlans ator pal mont. In dì di vuê, chest cjanton di internet al è un dai plui ferbints e ancje atîfs intal doprâ la lenghe par comunicâ te rêt.
_
Si spietaviso dut chest sucès in cussì pôcs agns?
A dî il vêr, se o vessin aprovâts ducj chei che a fasin domande par jentrâ tal grup vuê, o varessin di sigûr almancul 60.000 iscrits, ma noaltris o cjapìn par bon dome cui che al rispuint par furlan ae domande che e ven fûr cuant che si domande di iscrivisi. Cun di plui, o vin scugnût rindi il grup privât par evitâ che tancj a jentrassin cence aprovazion, duncje cui che nol è iscrit nol pues plui viodilu e condividi ce che al ven publicât, si che lis domandis cumò a son ladis al mancul.
_
Parcè vêso marcât chel “par cjargnel” intal titul?
Parcè che in Cjargne e je une fuarte identitât locâl. Al è vêr che il cjargnel al è une des tantis varietâts ma la int si sint prime cjargnele e daspò furlane. Fevelant di un de culinâr o de basse, tancj di lôr a disin: “al è di jù, dal Friûl”. Par doprâ une batude di Catine, un cjargnel al dîs “sta cidin, tu, che tu sês un 0432”!
_
Cui si iscrivial tal grup?
E cun trope frecuence partecipino i iscrits? La medie de etât e va dai 50 ai 60 agns, une vore alte. Su 22.500, chei che a scrivin dispès (cuasi ogni dì) a saran uns cent di lôr, chei che a publichin cun frecuence la metât, tancj di plui chei che a viodin posts o coments e che a metin un “mi plâs”.
_
Cuâi sono i contignûts che a àn plui sucès?
Il grup al è nassût soredut par fâ cuatri ridadis. E alore benvignudis lis batudis o lis vignetis ma a àn di jessi par furlan. Daspò si puedin publicâ fotografiis o filmâts che a vedin a ce fâ cul Friûl. Tancj posts a vegnin scancelâts parcè che no rispietin il regolament o parcè che a vegnin publicâts plui voltis in pôc timp. E soredut al ven scancelât dut ce che si cjate che nol è scrit par furlan.
_
O vin notât che cuant che si tirin fûr lis regulis de grafie al è simpri un tic di davoi tra i iscrits. Ce pensaiso di chest?
No si pues pretindi che ducj a savedin scrivi just. Tal regolament al è scrit che si puedin ancje fâ erôrs (ma se a son masse grivis, il post o il coment al ven scancelât). Ma cuant che si cîr di fâ capî cemût scrivi just, tante int si mustiche parcè che par lôr al va ben cemût che a scrivin lôr e no ur interesse di miorâsi. Tancj a disin che lôr a scrivin come che a fevelin. Va a fâur capî che il talian si scrîf compagn sedi a Udin che a Rome e Palermo, ancje se la fevelade locâl e je ben diferente di chê scrite!
_
Cemût funzionie la vuestre supervision?
Fra posts, vignetis e fotografiis publicâts ogni dì si pues rivâ tra i 20 e i 30. I coments a centenârs ogni dî. I aministradôrs a van a controlâ se a son in regule cul regolament e se ce che al ven scrit al è par furlan. Par regolament, ancje nuie politiche e nuie barufis.
_
Il vuestri al è un biel impegn. Ce us daie la fuarce e la volontât di lâ indevant?
La sodisfazion di cirî di mantignî vive la lenghe furlane. Clâr che l’impegn par mantignî il grup tes regulis e te educazion al è tant, in medie une ore e mieze in dì par aministradôr, cualchi volte ancje di plui.
_
Se o tornassis indaûr tal timp, tornaressiso a creâ chest grup?
Sigûr che o tornaressin a creâlu! In gracie dal grup ducj i doi o vin imparât a scrivi par furlan o, almancul, si sin miorâts tant! E tancj iscrits a àn declarât di vê miorât il lôr furlan scrit. Cun di plui, in gracie dal grup o vin cognossude di persone (e fat cognossi) tante int ancje impuartante de culture furlane (scritôrs, professôrs, cjantautôrs e altris). Ogni tant si fâs cualchi cene; la ultime l’an passât a Tresesin cun 60 personis; une serade bielonone che e à vût par ospits ancje Walter Tomada, Diego Navarria, Dree Valcic, Sandri D’Osualdo, Walter Maestra e o vin podût cjantâ insiemi a Dario Zampa. ❚