NO SON PERAULIS PAR VECJOS. Crowfunding

_Mandi nono, sâstu che il gno amì Marc al sta metint sù une aziende par vendi sapis a Triest?
Usti, a ‘nd à bêçs di butâ vie!
_Ma no, no ju met lui, i bêçs: al dopre il crowdfunding.
Il craud-ce?
_Il crowdfunding, nono. Si dopre un grum, in dì di vuê. Al è inglês: “crowd” al vûl dî int, e “funding” finanziament. In pratiche, se tu tu âs une idee, ma no tu as bêçs, tu domandis a chei altris di finanziâle.
Ah, ma clamile bancje, alore! Ce saltistu fûr cun chescj nons forescj?
_Ma no, nono, si clame crowdfunding propit parcè che si fâs cence lis bancjis. Tu metis la tô idee su internet e tu domandis bêçs a int come te, dome che nol paie un sôl, ma a pain in tancj: ognidun al met alc par fâ une robe ducj insiemi. Ancje pôc, dome un euro.
Come cuant che al passe il muini a cjapâ sù lis ufiertis a messe par comedâ il cjampanili?
_Une robe dal gjenar, sì.
E ancje il to amì, dopo vê comedât il cjampanili si comprial la Mercedes, come pre Jacum?
_Ma no, nono, il crowfunding e je une robe “etiche”. No tu vâs di nissune bande se no tu crodis te idee e in cui che le puarte indevant.
Ma, al sarà. Ma cui che al met i bêçs, ce i tornial indaûr?
_Cualchi volte dome un “contentin”. Se si finanzie la publicazion di un libri, par esempli, ti pues rivâ un scont par comprâ une copie. Ma il plui des voltis un al met i bêçs e vonde, cence vê nuie indaûr, dome la sodisfazion di viodi realizât il progjet.
Il progjet di cualchidun altri.
_Sì.
Cussì, chel chi al fâs ce che al à voie di fâ, ma cence meti un franc?
_Si, ma al à metût la idee!
O ai capît, alore. Nol è nuie di gnûf. Ancje il gno amì Vigji al fâs simpri crowdfunding.
_Aial metût cualchi progjet tal web?
No, ma al bute simpri li la idee “Lino a bevi alc?”; chei altris a pain il zîr e cuant che i tocje a lui al scjampe vie. ❚
✒ Bete Di Spere