Lou Seriol al è il non di une des bands plui interessantis e innomenadis de musiche ocitane, in gjenerâl, des Alps ai Pirineus e dal Mediterani al Atlantic, e no dome des Valadis dal Piemont, di dulà che a vegnin.
Di cualchi setemane al è saltât fûr il disc gnûf dal cuintet. Il so titul al è “Occitan” e al è pardabon biel. A son dodis cjançons che a rapresentin in maniere fedêl il profîl musicâl dal grup e lis sôs evoluzions plui resintis. La misture “classiche” e ruspiose di folk e rock, imbastide cun snait e cun energjie e zaromai cun passe vincj agns di esperience in studi e soredut dal vîf, si inricjìs ancjemò di plui che tal passât di influencis reggae e dub, par esempli in “Occitania” e “Zen”, si stramude in balade blues in “Duerm”, si colore di melodie in “Darbon” cu la complicitât dai marsiliês Moussu T e Blu, si contamine di funk in “Ladres”, e fintremai e devente une sorte di discomusic in “La Dança dau Bolet” e un omaç scalembri ai Sex Pistols in “Anarquia in Occitania”. Biel e vonde. ❚
Marco Stolfo
