NO PAR FURLAN… MA BOGNS. La lenghe furlane contade par inglês / “IS”, Arrogalla al messede vôs e sunôrs de Sardegne

La lenghe furlane contade par inglês
Tal 2007 l’innomenât neurolic e neurolinguist Franc Fari al meteve adun une racuelte di saçs cun chê di dâ fûr un manuâl di alte divulgazion scrit par furlan e dedicât ae lenghe furlane. Vot agns dopo chel test al salte fûr intune gnove version fûr par fûr par inglês: Handbook of Friulian Linguistics.
I contribûts di Giovanni Frau su la storie de lenghe, di Franco Finco su fonetiche e fonologjie, di Laura Vanelli su la morfologjie, di Paola Benincà su la sintassi, di Carla Marcato sui aspiets lessicâi e semantics, di Federico Vicario sui dialets dal furlan e di Alessandro Tavano e Elena Collavin sui aspiets pragmatics a son stâts inzornâts e voltâts. La part su la neurolinguistiche, che in chê volte e jere stade prontade di Fari, cumò e ven firmade di lui e di Cristiano Crescentini, compagn de cure di dut il volum.
Par sigûr, cemût che a scrivin tes lôr prefazions Furio Honsell e Alberto Felice De Toni, cheste edizion par inglês e varès di slargjâ la cognossince de lenghe furlane, massime tal mont academic. Propit par chel, cul libri sot dai voi, si stente a capî cemût mai che in cualchidun dai saçs lis parts testuâls par furlan no son scritis te sô grafie uficiâl (e nancje te grafie fonetiche internazionâl) e si domandisi se no si varès podût zontâ alc ancje in cont dai aspiets sociolinguistics e politics.
F. Fabbro – C. Crescentini (eds), Handbook of Friulian Linguistics, Forum, Udin, 2015. ❚ (Ma- Sto.)
_______________________________
“IS”, Arrogalla al messede vôs e sunôrs de Sardegne
Arrogalla al torne a colpî, tant che musicist, rangjadôr e produtôr e pai dîs agns de etichete discografiche S’Ardmusic al messede vôs e sunôrs e al met dongje un disc che in chel istès al è un omaç ae produzion musicâl sarde contemporanie e ae scriture di Sergio Atzeni.
Il compositôr di Quartu Sant’Elena al recupere materiâi che a fasin part dal repertori di Elena Ledda, Mauro Palmas, Andrea Parodi, Elva Lutza e Mario Brai e si zove de colaborazion di diviers di lôr, a  tacâ dal Cuncordu ‘e su Rosariu di Santu Lussurgiu e di Gavino Murgia. Il risultât al è plasevul e inmagant.
Arrogalla, IS – S’Ardmusic Revisited vol. 1, cd S’Ardmusic, 2016. ❚ (Ma- Sto.)