I Slovens in Friûl e a Triest, tal cûr de Europe
Al è jessût za di cualchi mês un gnûf libri che al da cont de situazion de minorance slovene in Friûl e a Triest. Il so titul al è Una comunità nel cuore dell’Europa. Gli sloveni in Italia dal crollo del Muro di Berlino alle sfide del terzo millennio e al è une ricuelte di saçs, par cure di Norina Bogatec e Zaira Vidau, che e permet a cui che al lei di vê un cuadri complet e inzornât de realtât dai slovens che a son tal Stât talian.
Lis tantis specificitâts di chê comunitât a son presentadis dai diviers autôrs coinvolzûts te publicazion in maniere clare e cun sioretât di contignûts e di documentazion e a vegnin fatis indenant riflessions interessantis, intune suaze storiche e teoriche semplice, precise e ordenade e cuntune atenzion specifiche pai mudaments che a son stâts a tacâ de fin dai agns Otante dal secul passât.
(Marco Stolfo)
N. Bogatec, Z. Vidau (cur.), ‘Una comunità nel cuore dell’Europa. Gli sloveni in Italia dal crollo del Muro di Berlino alle sfide del terzo millennio’, Carocci, Rome, 2017
……………………………………………………………………………….
Esposa, de Galizie une buine dose di pop legri, lizêr e di sostance
Esposa al è il non di un cuartet che al rive des bandis di Sant Jacum di Galizie e che al cjante cun snait e cun braùre par ‘galego’. Ae fin di Març di chest an il grup al à screât il so album di esordi, Xardín Interior, che al ten dongje dodis tocs pardabon siôrs di ritmi, di melodie e di energje.
Chel dai Esposa al è un pop saurît e inteligjent, sempliç e plasevul, che al cjape ispirazion di plui bandis e che al sune origjinâl, massime in graciis des vôs, de mancjance dal bas e dal lavôr che a fasin ghitaris, tastieris e percussions.
Lis struturis compositivis lizeris e in chel istès fuartis a sapontin tescj di sostance e il risultât al è une cjadene di cjançons curtis e che… si scoltin cun plasê. (Marco Stolfo)
Esposa, ‘Xardín Interior‘, cd 2017.
