Sfuei Mensîl Furlan Indipendent
Archivi de Patrie

Nicole Coceancig: la vôs dal coragjo e de inclusion e rapresente il Friûl a Suns Europe e in Italie

Moira Pezzetta

Nicole Coceancig, zovine cjantautore furlane, e rapresente une des plui preseadis vôs de musiche furlane e ancje taliane, cun la abilitât di dâ vôs ai invisibii, ai diviers, e a chei che a lotin ai confins de societât. La sô art e je une fusion di autenticitât e sensibilitât, esprimude te lenghe de sô tiere, il furlan.
◆ O vin za scrit di jê, e dai siei progjets puartâts indenant ancje cun altris brâfs cjantautôrs e musiciscj furlans. Cu la vitorie de XXVII edizion dal prestigjôs Premi Ciampi, Nicole si è afermade come une des vôs plui di rilêf e origjinâls de sene musicâl taliane contemporanie.
◆ Il Premi Ciampi, dedicât al ricuart dal cjantautôr livornês Piero Ciampi, al è cognossût par premiâ chei artiscj che a fasin musiche fûr dai schemis, cence compromès, in mût autentic e cuintri curint. Chest an, Nicole e à concuistât la zurie presentant doi siei tocs origjinâi, “Cjare mame” e “Di trop che o ai cjaminât”. I tocs che e scrîf a son par furlan, parcè che la sô lenghe e devente strument di resistence culturâl e mieç par contâ storiis fuartis e universâls. In particolâr, “Di trop che o ai cjaminât” al è stât sielt ancje par SUNS Europe, il festival internazionâl che al celebre lis lenghis minoritariis rivât ae sô decime edizion, dulà che Nicole e à rapresentât il Friûl intune fieste de musiche adun cun artiscj di diviersis nazionalitâts e lenghis.
◆ La partecipazion di Nicole a SUNS Europe e je un pas decisîf te sô cariere, parcè che chest festival, che al celebre la diversitât linguistiche e culturâl di tancj popui de Europe, al è la suaze ideâl par une artiste come jê. La sô esibizion dai 19 di Otubar stâts a Udin e à sigjilât il so rûl impuartant di rapresentante dal Friûl, cuntun messaç di sperance e dignitât che e vûl trasmeti tes sôs cjançons. La sô presince a chest festival e à dimostrât une volte di plui cemût che la musiche e rive a puartâ il furlan sui palcs internazionâi, fasint de sô lenghe une vôs universâl che puarte cun se i valôrs di inclusion e coragjo.
◆ Ce che al rint Nicole une cjantautore speciâl e je la profonditât dai temis che e tocje tes sôs cjançon. I sei tocs a contin storiis di coragjo, di emancipazion, di chei che a lotin par un futûr miôr. La sô vôs fuarte e sclete e tocje la anime, fasint rivocâ lis vôs di chei che spes a restin cence o a vegnin metûts a tasê. Il so impegn par une musiche sociâl si viôt in ogni note e ogni peraule che e scrîf.
◆ L’album tant spietât “Zohra”, che al rivarà in Dicembar, al e un concept album dut par furlan, e al rapresente un moment di svolte tal percors di Nicole. “Zohra” al conte la storie di une zovine frute pakistane che, passant pai Balcans, e scjampe tal Friûl par cirî libertât e dignitât. E je une storie che e conte di coragjo e di resistence, e dentri la figure di Zohra, Nicole e dâ vôs a dutis chês feminis cul sium di fâ une vite plui buine, vê un futûr, ma che no puedin partî par vie dai tancj impediments.
«E je une storie di coragjo,» e spieghe Nicole, «che e cir di dâ vôs a dutis chês feminis che, come Zohra, a ciraressin di scjampâ, ma no puedin par vie di les e politichis injustis. La mê musiche e je feminîl e sociâl, impegnade a lotâ cuintri lis injustiziis e a promovi la inclusion.»
◆ Il sô debut discografic dal 2019 cun l’album “Effe” al à za dimostrât il sô talent di miscliçâ sonoritâts popolârs furlanis cun tescj che a maravein par la lôr imediatece e veretât. Ma al e cun il gnûf album “Zohra” che Nicole a vûl fâ un pas plui decisîf, creant une musiche no dome par fâ divertî, ma par movi lis cussiencis e stimolâ il cambiament.
◆ Cuntune cariere in cressite, Nicole e je une artiste che e puarte sui palcs no dome la sô vôs, ma ancje un messaç di sperance e di lote par un mont plui just. La sô partecipazion a la serade di premiazion dal Premi Ciampi, il 21 di Novembar tal Teatri Goldoni di Livorno, e sarà une ocasion special par condividi la sô musiche cuntun public plui grant, condividint il palc cun artiscj come Nada, Teho Teardo e Blixa Bargeld. Ma ce che al marcje Nicole e je la sô capacitât di restâ autentiche, di cjantâ cun il cûr par chei che no àn vôs.
◆ Il viaç di Nicole Coceancig al è dome tacât, ma il sô impat su la musiche e su la societât al è za evident. Cun la sô musiche, Nicole e invide a riflet e a cjapâ posizion, trasformant ogni note in un at di resistence e di sperance. ❚

Lenghe minoritarie / FluxJudri25 – Giassico

Redazion
Conferece “Lingue minoritarie: le capitali della cultura e il rilancio del territorio” . A son intirvignûts Elena Gasparin, Dree Valcic president de Clape di Culture Patrie dal Friûl, Eros Cisillino president ARLeF, William Cisillino diretôr ARLeF, l’On. Guido Germano Pettarin e il coletif Lis Tarlupulis. FluxJudri25.Ca sot l’intervint di Valcic. lei di plui +

L’EDITORIÂL / Un Friûl disarmât

Walter Tomada
Lant ator pe Italie dispès al capite, cuant che si dîs di jessi furlans, di cjatâ int che nus dîs “Ah, mi visi dal Friûl! O ai fat il militâr a Udin!”. Prin dal taramot, un abitant su dîs chenti al jere un soldât e cheste ereditât di “tiere di primulis e casermis” se puartìn […] lei di plui +

Contile juste / Plebissît pustiç

Diego Navarria
“MMandi, nono.” “Mandi frut!” “Dai mo, nono, no soi un frut. O ai disenûf agns e o ai pene finît il liceu!” “Par me tu sarâs simpri un frut, il prin nevôt. Però e je vere, tu sês deventât grant, une anime lungje. Se tu cressis ancjemò tu varâs di sbassâti par jentrâ in cjase, […] lei di plui +

Presentazion / Presentazion dal libri “Fûc su Gurize”. Intal ambit dal Cors Pratic di Lenghe e Culture Furlane inmaneâtde Societât Filologjiche Furlane

Redazion
Joibe ai 17 di Avrîl dal 2025 aes sîs e mieze sore sere (18.30)SALE CONFERENCIS DE BIBLIOTECHE COMUNÂLVie Rome 10, Vile di Ruvigne / Via Roma 10, S.Giacomo di Ragogna A intervegnin: DIEGO NAVARRIA colaboradôr dal mensîl ‘La Patrie dal Friûl’e DREE ANDREA VALCIC president de Clape di Culture ‘Patrie dal Friûl’Jentrade libare lei di plui +

5 Par mil / DANUS UNE MAN

Redazion
5 PAR MIL – Ancje chest an, cu la declarazion dai redits tu puedis dâi une man a La Patrie dal Friûl, il mensîl dut in lenghe furlane dal 1946. Nol coste nuie, baste meti il numar 01299830305 te casele juste: Sostegn dal volontariât e des altris organizazions no lucratîvis di utilitât sociâl, des associazions […] lei di plui +