✽✽ La politiche taliane e à dât in chestis setemanis il miôr di se, mostrant, se ancjemò al covente, il disinterès totâl pal destin dal paîs, pensant dome ai interès di partît, aes prossimis elezions.
Chê regjonâl si è adeguade, anzit in cualchi câs e je stade anticipadore, no tant par impussibilis cjadudis istituzionâls, ma pe miopie che cun chê e à frontât i problemis che a aflizin chestis tieris. Nissune prevision di prospetive, pûr vint a disposizion une masse finanziarie che no à precedents: une serie di intervents parcelizâts, une distribuzion di ricjece a ploie, tant par no discontentâ nissun, tant mancul i bacins eletorâi di riferiment.
✽✽ Se vuê o domandassin al president Fedriga ce che al sarà di chel F-VJ, che simpri plui dispès al domine su lis sôs felpis e maiutis, di chi al deceni prossim, la rispueste e podarès dome che jessi: cui lu sa!
✽✽ Sigûr che nissun – massime vuê, cu lis crisis di ogni gjenar che a lambichin il mont – al à dotis profetichis, ma ae sô classe dirigjente il popul al à dut il dirit di domandâi dulà che si sedi daûr a lâ, cualis che a son lis prospetivis economichis e sociâls, ma soredut ce struments che si pense di adotâ par permeti di mantignî i nivei di cualitât de vite li che si è rivâts cun tancj sacrificis gjenerazionâi.
✽✽ O che si vedi il cûr di dî: tra pandemiis, vueris, inflazion nuie al sarà come prime.
Cui che si iludeve che al fos un temporâl, vuê si inacuarç che si trate di un ciclon.
✽✽ O podìn usâsi, cemût che i furlans a àn fat simpri, ma dome se lis robis a son claris e clârs ancje i obietîfs.
✽✽ Navigâ a viste, al puarte simpri a incaiâsi, o piês ancjemò a bati cuintri i scois. ❚
