MUSICHE. Musiche. I Mig 29 Over Disneyland no svolin plui, ma a son rivâts i Magic Lunch Double Crunch che si presentin cul lôr gnûf CD

A son un pôcs di mês che no si sintive fevelâ di lôr. Almancul de fin dal 2012. Parcè che i “Mig 29 Over Disneyland”, in efiets, no esistin plui. O, almancul, no cun chel non: i musiciscj cjargnei si clamin cumò i “Magic Lunch Double Crunch”: Alessandro De Cecco, Andrea Losanni e Alessandro Fusetti. Damiano Palla, invezit, al è lât a sunâ cul grup metal “Uneven”. Si sin cjatâts par fevelâ di cheste gnove aventure, che e à za dât vite a un video uficiâl (realizât cui regjiscj cjargnei Giuliano Cortolezzis e Nicola Silverio de “Nick & Giul Production”), un disc (“Automatic Day” regjistrât intal lôr studi, cui mixage di Davide Massussi e Davide Croatto dal “Moscow Studio” di Udin e i master di Roberto Rainis) e un tour in Patrie ma ancje vie pe Europe.
Alore fantats, cemût si diferenzial chest gnûf progjet dai Mig?
Chest progjet lu vin classificât plui sul pop/disco/grunge come gjenâr, mentri che i Mig a jerin plui punk, ancje se la base punk e reste simpri une vore presint ancje cumò.
Un grum di tocs a son par inglês. Dulà isal finît il furlan?
Il furlan lu doprìn ancjemò, ma par intant o vin fat jessî il disc in version inglese. Invezit il singul (“Automatic Day”, “Zornade Automatiche”) al è za vignût fûr tes dôs lenghis, inglês e furlan.
Dulà podìno scoltâus?
Par viodinus in version “dal vîf” o sunìn ogni setemane: ai 30 di Avrîl al è partît il nestri tour dal “Bibione Rock Festival”, po dopo o vin une schirie di datis fin in Avost. A Jugn, par esempli, o sunarìn a Tumiec ai 14, al Caneva Music Contest ai 15 e al Wild Rock Fest a Trep ai 22. O vin ancje un grum di datis tra Italie e Gjermanie (simpri a Jugn o sin ai 8 a Casaloca di Milan, ai 26 a Berlin e ai 29 a Amburc). In ogni mût sul nestri sît magiclunchdoublecrunch.com e su la nestre pagjine Facebook o podês cjatâ dutis lis informazions.
La Patrie di resint e à intervistât Lino Straulino su la sô so ricercje ae origjin de musiche furlane e nus à dit che cjantâ vilotis al è plui rivoluzionari che fâ rock. Ce pensaiso?
Secont nô, e je une robe un grum biele e interessante chê che al fâs Lino pe musiche furlane. O sperìn che al rivi al vêr inizi di cheste musiche, cussì di rivâ a diferenziâle di chei altris gjenars, ancje se o pensìn che e sedi dut câs une robe no tant semplice di fâ. Fuarce Lino!
Cuâl ise invezit le vuestre posizion sul fâ musiche in marilenghe?
Noaltris il furlan lu doprìn avonde in maniere “inglese”, ancje parcè che intal rock lis dôs lenghis si somein un pôc come cadencis e a son dutis dôs un grum musicâls. ❚
✒ Natascia Gargano