MUSICHE. Leterature on the air

Promovi la cognossince de gnove leterature furlane e invoiâ la int a scrivi par furlan. A son chescj i intindiments di fonde di dôs gnovis trasmissions di Radio Onde Furlane, tacadis cu la Vierte di chest an.
La prime e je “Peraulis scritis, peraulis ditis”, che e va in onde la sabide a 8 e mieze di buinore. Il program al à chê di svicinâ il public de radio ae leterature furlane dai nestris dîs par mieç de leture dramatizade di une cuindisine di contis scritis di autôrs tant che Raff BB Lazzara, Maurizi Mattiuzza, Stiefin Morat, Pierluigi Visintin, Laurin Zuan Nardin, Marco Stolfo, Boris e Ferdinando Passone e publicadis su “La Comugne” e su altris rivistis specializadis. A prestâ la sô vôs e la sô interpretazion a chescj tocs di leterature contemporanie e je la atore Aida Talliente, protagoniste sei di cetancj spetacui teatrâi di sucès sei in passât di altris trasmissions di argoment leterari e teatrâl su lis frecuencis di Radio Onde Furlane.
La seconde e je “Onde Curte”, iniziative radiofoniche che partìs de esperience dal blog leterari “Contecurte”. Ogni dì, dal lunis al vinars, tor 8 e un cuart di buinore (dopo dal GR e dal Meteo), tal palinsent di Onde Furlane a vegnin dadis fûr pirulis di leterature cu la leture di une des contis curtis – cun gjenars che a van dal horror al romantic, dal sociâl al ironic – publicadis sul blog di autôrs zovins za cognossûts o esordients. Ancje in chest câs si cjate la vôs di Aida Talliente. Cun di plui a lein lis contis curtis ancje Raffaele Serafini, che tra lis altris al è editor inte redazion di Edizioni XII, scritôr di narative e un dai creadôrs dal blog di “Contecurte”, Francesco Tami – scritôr e musicist, l’unic a vê vinçût Premi S. Simon, concors par senegjaturis in lenghe furlane dal CEC, e Premi Friûl – e Barbara Minen, colaboradore di Onde Furlane che zaromai di agns e cure la trasmission di leturis “La ore dal te”.
Tra lis novitât che tai ultins mês a àn inricjît il palinsest de radio libare dai furlans a meretin ricuardâts ancje il gnûf cicli dedicât ae musiche pal cine de rubriche di divulgazion musicâl “Corais musicâi”, curade e condusude di Lia Bront, in onde ogni dì, dal lunis al vinars, tor 7 e 30 di buinore.  ■
Redazion