MUSICHE. Kistalè

“Chist al è”. No replichis, dome une sute constatazion. “Kistalè”, peraule uniche che e conten la essenzialitât di cheste espression, al è il non dal gnûf disc dai Pantan, publicât di Nota in colaborazion cun Radio Onde Furlane e presentât al public ae fin di Avrîl stât. Al è il tierç lavôr dal grup, regjistrât intal FUDAstudio di Cuar di Rosacis (Udin), cu la formazion origjinâl Jvan Moda – vôs e ghitare, Alessandro Larocca – bas, e Daniele Furlan – batarie. Un grup fedêl ae marilenghe pe sô produzion musicâl dal 2000, an che al à partecipât e vinçût il Premi Friûl, e che al è rivât tai agns a sposâ perfetementri la lenghe cu la energjie rock.
In “Kistalè”, i Pantan a somein incazâts e tal fasin capî cun ritmis potents e tescj crûts, indulà che ti dan dal tu e ti cjalin ben dret tai voi, cence nissun zîr di peraulis. E a ’nd àn ancje par chei che a “piturin acuilis zalis”, “ancje parcè che lôr a son maron” (“Ionco de lanfur”). Al è clâr che no tire arie buine, il cûr al bat tal cjâf, il cîl al è come il plomp cheste gnot, il gjal jeve la creste, al è aiar di tampieste usgnot (“Aiar di burlaç”). E à an ancje lis lôr resons, insot, tu sês nassût cence nancje un tic di scont, par rivâ a vê alc al è ogni volte il finimont e doman un altri dì cence omaç (“Precari”). Il pinsîr al va ancje fûr dal barcon, cjalant lis migrazions e i popui lontans che in veretât nus son dongje ogni dì, come Assan che inmò ti poche sul porton o come une zovine femine dal Vietnam, che tantis rosis e à za dât (“Saigon”).
Le rabie e je chê di un frut cressût cence inmò usâsi a la sô grande delusion par chel soreli che nol è mai, dome ragns e ragns bastarts (“Rainy Days”) e par chê arsure di aghe amôr e di pietât, par dîle cu lis lôr peraulis.  Ma dute cheste durece e va vie intun moment sierant i voi e scoltant une dolcece che e fâs cussì: insegnigji amôr ai fioi, ti prei, no lassâju bessôi mai, mostrigji il mont ator, trop che al è grant, la pôre no à di vêju mai. Intal toc cul titul plui sempliç e biel che a podevin pensâ: “Amôr ai fioi”.
www.myspace.com/pantan ■
Natascia Gargano