Mieç consei regjonâl al zure par furlan

Interessante la prime sentade de XIII legjislature dal Consei regjonâl. Soredut pal zurament dai conseîrs. Si sa che di cualchi legjislature incà al è pussibil fâ il zurament, in plui che par talian, ancje tes lenghis di minorance ricognossudis de leç 482 dal 1999.
◆ Po ben, chest colp 23 elets su 49 a àn zurât intes leghis di minorance. In particolâr 21 par furlan, 3 par sloven, 3 par todesc. In doi câs, il conseîr Mazzolini e il president Fedriga, a àn zurât adiriture doprant dutis e trê lis lenghis di minorance.
◆ Ancje la distribuzion daûr dai partîts di partignince e je interessante. 6 elets dal PD: Carli, Celotti, Martines e Pozzo par furlan; Pisani par sloven; Mentil par todesc; 5 de Leghe (che une volte e jere dal Nord e che cumò e je di Salvini): Bordin, Budai, Fedriga, Ferrari, Miani par furlan; Fedriga ancje par todesc e par sloven; 5 de Liste Fedriga: Bernardis, Di Bert, Lirutti, Mazzolini e Morandini par furlan; Mazzolini ancje par sloven e todesc; 2 dal Pat pe Autonomie: Liguori e Moretuzzo par furlan; un di Forza Italia: Novelli par furlan. E insom, e cheste e je une gnove di regjistrâ, ancje 4 conseîrs di Fratelli d’Italia: Anzil, Basso, Maurmair e Treleani che a àn doprât ancje il furlan.
◆ Un bon segn che la tornade legjislative si vierzi in chest mût: o sperìn che e sedi la spie di une gnove cussience. La specificitât di cheste regjon, di fat, e je la presince e la convivence pacjifiche di plui minorancis linguistichis e duncje di plui culturis che a àn dirit di esistence e, se mai, di incressite intun confront che al inricjìs chest sflicut di tiere tal cûr de Europe.
◆ O volìn sperâ che al sedi il moment just par frontâ la riscriture dal statût de autonomie, aromai “vecjo” di sessante agns, cul inseriment necessari e indilazionabil des minorancis linguistichis che ancjemò no son previodudis ni ricognossudis di nissun articul.
◆ Ma, di là dal fat juridic impuartant, nus plasarès che, intune stagjon di discussions a nivel statâl su lis modifichis costituzionâls e su lis autonomiis diferenziadis, si cjatàs il timp e la volontât par decidi in regjon su cuistions impuartantis come la competence primarie te scuele, il furlan tai orghins di informazion publics, in particolâr inte RAI che altris regjons a statût speciâl a àn za di tant timp, e sul rûl des assembleis des comunitâts linguistichis todescje e furlane za in vore, e su la costituzion di chê slovene, par ricognossi un rûl ancje ai comuns.
◆ In chest sens nus pâr une vore significatîf il zurament dal president Fedriga in dutis e trê lis lenghis di minorance. O sperìn che nol sedi dome “folclôr” ma un at fuart par marcâ une diference, une alteritât rispiet al stât talian. Po dopo, no volaressin che chestis culturis diferentis a vignissin messedadis intal unic cjalderon dal “io sono FVG”, un esperiment di inzegnarie gjenetiche che nancje in timps di ogm al è destinât a funzionâ. ❚