Nassude a San Denêl, e à realizât plui di un centenâr di cuadris cu lis pieris che al puarte il flum
Ce rapresentino i siei cuadris, e cemût sielzie i siei sogjets?
“Pes mês oparis mi lassi ispirâ de bielece de mê regjon, là che o soi nassude e là che o ai vivût dute la vite, e che o ami cun dut il cûr. La mê e je prin di dut une rapresentazion di chel che al jere il Friûl une volte, cemût che mal visi tai timps che o jeri frute; alore o ricostruìs imagjins de vite contadine di une volte, tant che par esempli piçui borcs furlans fats di cjasis cun mûrs di clap, grancj puartis e scjalis di len, cusinis e tinei plens di ogjets rustics che si dopravin ogni dì intes abitazions di tancj agns indaûr, e tant altri ancjemò. Ognidune di chestis imagjins e je inricjide cun tancj detais, ripuartâts simpri cu la massime semplicitât e cirint plui pussibil il realisim, di mût che cui che lis cjale al puedi ricognossilis e viodilis tant che alc di concret e di propri. In chest mût o fâs rivivi il Friûl che o ai cognossût, là che o soi cressude e che mi è restât intal cûr.
Di là di chest, o ricrei diviers paisaçs naturâi e carateristics (boscs in Sierade, panoramis di mont, flums che si disglagnin fûr pes monts, prâts), e une vore di detais in prin plan, tant che vâs plens di rosis, ucieluts poiâts sui ramaçs di un arbul, o ancjemò un fiasc di vin dongje di un zei di pan.
No je mai une sielte “premeditade” di ce che o rapresentarai: mi lassi ispirâ dal clap che o cjati, o osservi la forme, il colôr, la altece, e in chel o viôt une cierte imagjin invezit che une altre. Dopo, cuant che mi met a lavorâ, al ven dut di bessôl, in maniere spontanie. Intant che o soi daûr a fâ un cuadri mi sint cuasi smaniose di finîlu, parcè che o sai za cemût che al sarà chel dopo, e no fidi la ore di scomençâlu. A vuê, o ai fat plui di cent cuadris.”
_
Cemût nassie cheste sô passion?
“La ispirazion par chescj lavôrs e rive de mê infanzie, o ben dai timps che gno nono, cuant che al tornave a cjase dal lavôr intai cjamps, mi puartave simpri i claputs plui biei e particolârs che al rivave a cjatâ. A mi mi plaseve tant osservâju ducj, e tancj agns dopo, cuasi par câs, mi è vignude iniment la idee di doprâju par creâ alc di biel e dut gno, metint insiemi l’ûs di pôcs ogjets sempliçs, lis imagjins che a vegnin dai miei ricuarts e la ispirazion che mi regale la mê tiere. O ai scomençât cuasi par câs plui o mancul vincj agns indaûr, intun periodi avonde dificil de mê vite li che o sintivi la dibisugne di straviâmi dai masse pinsîrs. Dâ sbroc a cheste passion mi à coventât propit a chest, a imerzimi in chê, “dismenteant” il rest dal mont. Al è alc che par tancj agns o ai fat dome par me, cence pensâ propit di meti in mostre lis mês oparis, o di vendilis.”
_
Ce imprescj e materiâi doprie pes sôs oparis?
“Il materiâl principâl a son dal sigûr i claps, che o cjapi sù in diviers lûcs dilunc des mês cjaminadis. Di là di chei, mi covente ben pôc: un fonts pe base, la cole par tacâ i claps un par un, un martielut e une tanaie par regolâ la superficie dal clap su la fonde di ce che al larà dopo a rapresentâ a lavôr finît.
O ten ancje a marcâ che ducj i claps che o dopri pai miei cuadris a àn il lôr colôr naturâl, no ju pituri mai: o calcoli che la nature e crei bessole colôrs e sfumaduris che pe viste a son delicâts e mai “ecessîfs”, e duncje nol sarès just alterâju.
Intai miei cuadris la uniche robe che mi capite di piturâ al è il fonts, come par esempli intal câs là che o ricrei un paisaç e al covente piturât il cîl: alore lu colori cun lapis a acuarel colorâts. Ma o dopri simpri colôrs lizêrs e plasevui di cjalâ, in maniere cetant contignude.”
__
Intai ultins agns jê e à fat trê mostris: dulà sono stadis prontadis, e cemût sono stadis acetadis?
“Sul imprin no volevi esponi lis mês oparis, tratantsi di alc che o realizavi dome par me, ma ae fin mi soi convinçude a fâlu, e intal 2018 o vin preparât la prime mostre tal Cjistiel di Ruvigne. Dopo, intal 2021 o ai esponût tal Cjistiel Savorgnan di Dartigne e chest an, dai 24 di Jugn ai 23 di Lui, tal Fuart di Cuel Roncon a Rivis Darcjan.
O ai di dî che la reazion dai visitadôrs e je stade simpri di grant entusiasim: tancj si emozionin, soredut intal viodi riprodot un Friûl che aromai al è daûr a lâ pierdût, e mi disin che i cuadris a son tant realistics e plens di detais che, cjalantju, al somee cuasi di podê jentrâ dentri. Lis peraulis de int e lis dedichis che mi scrivin a son cetant bielis, e mi pain dal lavôr fat pe preparazion de mostre, che e domande tant timp e fature.
Mi calcoli une vore sodisfate dal risultât, ancje se, dentri di me, o soi malpaziente di ripuartâ i miei cuadris a cjase e di tornâ a metimi a la opare par fânt tancj di gnûfs, che par chei o ai za iniment un grant numar di ideis. La robe plui biele e je simpri chê di creâ alc che mi nas di dentri e che mi inricjìs.” ❚
