MEDITANTLIS TAL SO CÛR. Tal tierç aniversari

Ce svelt, pre Antoni benedet, che il timp al passe! Mi somee chê altre dì che o vevin di cjatâsi a gustâ insieme pe sagre di S. Marc a Savonelis e invezit a son za trê agns che in chê gnot e inte gnot sul ôr de strade tu nus âs lassâts.
La tô tombe ancje dopo tant timp e continue a florî di rosis e lumins e in chest aniversari ancje jo o vuei vignî a cjatâti cun trê piçui regai. Prin di dut o pon dongje di te un sacut di semencis di ort e di zardin par vie che Franco Maschio di Maian, un artist cognossût dentri e fûr dal Friûl, al à fat un bozet li che ti presente vistît di contadin. Tu âs braghessis di lavôr, une cjamese cu lis maniis curtis e intai pîts scarpis di campagne. Te man çampe tu tegnis la Bibie, il libri de liberazion, e tu vierzis la diestre intal at di semenâ. Tu sês propit tu; di fat tu âs semenade cussience e spiritualitât, culture e dignitât par dute la tô vite.
Daspò ti regali une viole, rosute de tô simpatie e dal to cûr. La viole che ti pon e je la tesi di lauree di Mauro Della Schiava, un zovin che al à ancje in consegne il to cjanut. E à par titul: «Restâ cu la int, la esperience di Glesie Furlane» e te dediche e dîs: «Se alc al nas, al vûl dî che la semence no je stade butade e coltade di bant. Dedicât a voaltris, a lis vuestris ideis, a lis vuestris passions, al vuestri crodi e a pre Toni».
Al è dentri il to credo e il to lavôr.
E o met cumò tal vâs un ramaç di ulîf simbul di pâs. L’ulivâr mi fâs pensâ a la «Opera omnia» che Glesie Furlane e à començât a publicâ: une vore ben imbrucjade e che e menarà riflession e justizie e duncje gjenuine e autentiche pâs.
Al è vêr, al è pôc un sacut di semencis, la viole, il ramaç, ma nus pandin che il tesaur al è in te, nus visin de vierte che e torne, nus vierzin i voi su di un altri Friûl.
La tô tombe e florìs di rosis vivis e veris e cui sa tropis paveis, avons, gjespis e âfs che a businin e a gjoldin tra chei colôrs e bonodôrs cjapant sù e menant semençutis lontan e in tieris a nô scognossudis. Chês âfs o sin ancje nô che vuê ti ricuardìn; e ancje cun nô la tô peraule e rive li che nissun varès mai inmagjinât.
pre Tonin Cjapielâr