MEDITANTLIS TAL SO CÛR. Par pre Tonin

ChestE volte nol comparìs il solit articul di pre Tonin Cjapielâr, che si à cjapât un moment di polse. La Patrie dal Friûl cun ducj i colaboradôrs e sotscrîf la letare che un trop di amîs al à metût adun par testemoneâ a pre Tonin Cjapielâr l’afiet che o vin tai siei confronts. Un grazie particolâr par Agnul Floramo e Paolo Marcuzzi che a àn cjapade la iniziative.
In pocjis oris la stesse letare e je stade sotscrite di passe 200 personis dome a Ruvigne e Muris, i doi paîs dulà che pre Tonin al è plevan.
***
Cjâr pre Tonin,
Se e je vere che i amîs, chei vêrs, si fasin sintî propit cuant che la barcje e je in grande dificoltât par vie de burascje, ve chi che o sin, ducj dongje di te. No podìn fâ tant, ma o vin voie di dimostrâti che no ti lassìn di bessôl ta chest moment. O savìn ben, parcè che ti cognossìn di agnorums, che il to cûr sclet e bon, parcè che tu sês un om bon e duncje ancje un bon pastôr. Cualchi volte si pues ancje sbaliâ, sbrissâ o inçopedâsi sui claps de vite, che a son insidiôs. Ma cuant che la reson dal erôr e je detade dal cûr, nissun nol pues fevelâ di colpe. Chei che a sbandierin la Prudence tant che virtût cristiane, dispès si dismentein di chê altre, la Caritât, ven a stâi l’Amôr, che nus sburte a pensâ di fâ dal ben a di chei altris cence cjalâ a lis conseguencis. E cence Amôr e dîs la Bibie, che tu tu cognossis cussì ben, no saressin nuie altri che une cjampane rote. Alore propit in non di chest Amôr o sin chi, dongje di te, pre Tonin. Come amîs e fradis. La buriane e passarà. Al tornarà il Soreli. E come che cumò o sin chi par sostignîti e consolâti, ta chê volte o sarìn li par gjoldi cun te.
Cun afiet!
la Patrie dal Friûl