Sfuei Mensîl Furlan Indipendent
Archivi de Patrie

MEDITANTLIS TAL SO CÛR. O crôt ancjemò te int

............

I emigrants rivâts in Friûl, simpri plui rârs, aromai a son partîts; si son viertis lis scuelis e dut, dopo la polse di Istât al somee rientrât inte norme: une cuiete suturne parcè che si svicinin lis gnots e i frêts dal Invier intant che i lens a son simpri mancul e la cuzine par taponâsi si scurte. Di fat, mi stoi domandant cemût che o larìn indevant in cheste situazion cjamade di brutis sorpresis, cul spavent de mancjance di lavôr, la benzine simpri plui cjare e tassis micidiâls.
La realtât e je cheste: la situazion e pegjorarà. Intant, simpri chês musis a pontifichin te politiche de television. Par plasê tornait cjase; lait a fâ i turnos a cjadene tai capanons, a incatramâ lis stradis te canicule di Avost, a meti jù cops sui cuvierts cuant che e svinte la buere; vivêt dodis mês cu la paie dal operari o cu la minime de pension. Mi sgrisuli ancje a olmâ lis elezions che a vignaran te prossime Vierte: o assistarìn a un spetacul di ilusioniscj. O vivìn fra istituzions fûr di plomp che a pratindin di risolvi une profonde mancjance di valôrs dome cu la monede.
Baroniis ritiraitsi; par plasê lassait strade a la zoventût; voaltris o vês sbaliât; vadì che i zovins si compuartaran miôr.
Cumò mi domandi cemût che la nestre int e cjatarà il cjaveç in chest nevrotic gjespâr. Cemût si salvaraial il nestri Friûl? No midiant des istituzions, ancje se a coventin; la sô fuarce e sarà ancjemò une volte tes personis di ogni dì. No crôt te umanitât dai aparâts; no crôt tal furmiâr des leçs; no crôt tune burocrazie che e scjafoie; no crôt tai proclamis dai studiâts; no crôt tun stât al servizi dal citadin… O crôt ancjemò tal valôr des singulis personis; o ai fiducie ancjemò tai Furlans che a san patî pai valôrs.
Mi disaran populist o iludût, ignorant o fûr de realtât; ma rifletint su la storie, no son i sorestants che a àn salvât cheste tiere; se il nestri popul al sorevîf, al è merit de int e des sôs cualitâts.
Tal taramot dal 1976, lis istituzions a àn dade une man, ma la ricostruzion e je nassude des capacitâts, de grinte, dai scombatiments dai paîs.
A disin che vuê, nô no vivìn tun taramot, ma si cjatìn inte tierce vuere mondiâl.
Cuant che dal 1917 a Cjaurêt al fo spacât il front talian, a partirin dal Friûl sui 120.000; fra di lôr e jere ancje la famee di gno nono Zuan, che sierât il clostri di cjase si è metût par strade puartant cun se une piece di formadi e une piçule Madone di Lourdes; a jerin i simbui de sorevivence dal cuarp e de anime. O varìn simpri plui dibisugne di personis cussì: prontis a scombati pal lavôr e pal pan e ben plantadis tai valôrs dal spirt. ■
pre Tonin Cjapielâr

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +