MEDITANTLIS TAL SO CÛR. Imparait a nadâ

In relazion al taramot dal Abruç e a la propagande sul «modello Friuli», mi somee che ancje in chest câs i furlans a vegnin cjolts saldo pal cûl o doprâts. Di fat, di une bande si ostacule la dignitât dal popul furlan, di chê altre si puarte in palme di man «il modello Friuli»; in alt si stente a crodi a une etnie, no si acete une lenghe, però o vin la universitât dal Friûl; e ven dineade une glesie furlane ma si predicje di matignî lis tradizions.
Si bêf la aghe dal flum, ma no si vûl savêdint de risultive. Al è come se si disès ai taramotâts dal Abruç: «Cjalait a ce che al è stât fat in Friûl, ma no stait a imparâ dai Furlans».
Un esempli di cheste veretât si lu cjate ancje inte fieste de Patrie stade di pôc ai 3 di Avrîl. I gjornâi a àn cirût di cambiâ une grande date intune polemiche tra partîts: che al vûl dî no crodi al popul furlan.
Cjacarant dal «modello Friuli»di meti in pratiche ancje in Abruç, al reste vêr ce che il guvier, comissaris, istituzions, sindics a àn fat, ma il judâsi de int, il sudôr des fameis, il lavôr di un lusôr a chel altri a cui ju lassìno?
Tignìn ben presint che la universitât dal Friûl e je stade otignude cu lis firmis de int che e viveve tra lis maseriis, contraris partîts e la plui part dai altolocâts. La grande manifestazion dai taramotâts a Triest e a vût cuintri partîts, Sindacâts e Aministradôrs.
Ce saressie stade la ricostruzion cence un grant moviment popolâr? Ce saressial stât dal domo e de citadine di Vençon cence un valit comitât di paîs?
Cuant che al capite un taramot no colin dome lis cjasis, ma ancje un mont interiôr e la ricostruzion no sarà prime di dut intai aiûts dai forescj ma intal profont de proprie identitât, se il taramotât, chel mont interiôr, al rive a salvâlu.
In Friûl, cuant che la culture popolâr cun ducj i siei limits e à vinçût, al paîs i è tornade une anime vive; invezit, li che altris logjichis si son imponudis, la ricostruzion e je restade glaçade. Chest nol vûl dî jessi cuintri di sorestants e di studiâts: al vûl dome dî che la vite e je dentri de int. Dome se i aiûts si insedaran inte proprie culture popolâr milenarie, l’Abruç al tornarà a jessi vîf; al contrari al restarà un muart rianimât.
La passerele continue di politics, di vescui, di grancj e sa plui di propagande che di serietât; o preferissarès dâ fuarce e notorietât ai moviments popolârs cun dutis lis lôr pecjis e augurâ ai nestris amîs taramotâts di ringraziâ ducj ma di doprâ il propri cjâf. Al è il «di bessôi» dai Furlans.
E conte une storiute che intune splendide val tra lis monts, al jere un paisut li che al coreve un biel flum. Une dì une comission si presentà e e visà: » Us tocje slozâ: e je di fâ une dighe e il paisut al vignarà sumierzût». La int no voleve partî. Ma ce fâ? A lerin di un grant inzegnîr che ur disè: «Bisugne fâ sù un mûr torator dal paîs » ma la int e ridè. A lerin di un predi; al proferì: «Al tocje preâ» ma la int no i crodè. A lerin di un vieli che al viveve tal bosc e chel ju conseà: «Se o volês vivi intal vuestri paîs, imparait a nadâ». Al è ce che a àn fat i furlans di secui e secui in ca. Al è l’auguri che di cûr ur fasìn ai amîs dal Abruç.
pre Tonin Cjapielâr