MEDITANTLIS TAL SO CÛR. I ultins a saran prins

Cjalant l’insert de Patrie dal Friûl: “Speciâl leture continue de Bibie par furlan – La storie, la int, lis emozions dal event culturâl plui grant dal 2011 in Friûl” e partecipant al incuintri in sale Ajace a Udin pe presentazion dal insert mi è vignût tal cjâf il verset dal Vanzeli: “I ultins a saran prins”. (Mt 20,16)
Fra i ultims che a saran prins nus tocje meti ancje la Bibie par furlan par vie che, nassude a Montenârs, a Rualp e Val, a Visepente, e continue a jessi foreste tai programs pastorâi de diocesi. Ma la Bibie par furlan e je tra i prins dal Vanzeli par vie che dute la riflession teologjiche moderne e je dacuardi tal declarâ che il mont gnûf e la gnove vanzelizazion a varan di partî de autonomie e de valorizazion des culturis popolârs.
L’event di chest an nus palese ancje un altri segret: la Bibie par furlan no je il libri dai predis, ma chel de nestre int. Di fat la plui part dai predis e des istituzions diocesanis le ignorin cuasit dal dut intant che la int di ogni dì e à dimostrât di tignîle in onôr. Ancje la cunvigne in sale Ajace lu palese. E cussì al sucêt ancjemò une volte ce che  al à dit Gjesù: “I ultins a saran prins, e i prins ultins”. I predis che pe Bibie a varessin di jessi in prime file si palesin ultins, e chei dal ultin banc, considerâts i mus, si cjatin prins. Al è un misteri ancje chest.
Popul, culture, lenghe, travais, cussientizazion, spiritualitât e liberazion a son dutun, e culì di nô a cjatin la lôr miôr espression te Bibie par furlan.
O podaressin dî che a esistin dôs Bibiis: une par talian e une par furlan, o miôr une uniche Bibie, peraule di Diu, lete de bande dai prins o dai ultins.
Culì in Friûl la Bibie par talian e je peade al podê clericâl e politic, chê par furlan e florìs dal bas inte comunitât; la prime e partìs dal dogme, la ultime de antropologjie; la prime si siere te intimitât, la ultime si vierç a la cussientizazion dal sociâl; chê par talian e ignore lis etniis, chê par furlan, lis valorize. Chê par talian e rapresente la culture dominant che e crice di ogni bande, chê par furlan e je semence dal mont che al varà di vignî. Il podê si servìs de prime; i tibiâts, tal Spirt di Gjesù Crist, te ultime a respirin.
Par chest mi tocje ringraziâ la ARLeF pal Event e La Patrie dal Friûl pe cunvigne dal “Speciâl de Bibie”; us soi ricognossint come furlan e come ultin; che il Signôr us vuardi di ogni mâl e us benedissi.
pre Tonin Cjapielâr