Cun chest fumet Mattia al à vint il premi S. Simon 2024, inte sezion dedicade. Il volum al ten dentri, intes sôs cincuante pagjinis, ancje chês altris trê storiutis che a àn partecipât: Mattotti in vile di Matteo Batetta (segnalade), Perin di Puartis di Gio Di Qual e Gio De Luca e Inlà da la metât di Martino Bonaldo, Elisa Meri Pilot e Rebecca Del Zuanne.
◆ Chel dal formadi al jere il teme de storie di disvilupâ. E ducj i cuatri protagoniscj lu àn cjatât. Al è Toni che i bat lis crostis a un che si proclame campion intai videozûcs suntune splaze (e une Furie Fatâl lu veve ben visât di no alçâ tant lis alis!) Al è un lizêr tremaç di une man che si pronte a piturâ. Al è un incuisitôr che al condane come eretic un pitôr che al à olsât rapresentâ Jesù che al spose la Madalene (ma lui al cjatarà cemût svuincâle). Al è un siorlui signestri che si lu viôt sentât di schene e al è che al spiete trê zovenuts che a duarmin intai sacs a pêl.
◆ Il dissen al presente une vore di varietât. In Modde un blanc e neri gnervôs e ridondant si adate in maniere perfete cul clime sberlon di une cualsisei splaze plene di int (no mancjin cuatri vecjuts che a zuin di scove). Plui sevêr e controlât chel di Batetta, che al met dentri ancje il colôr, ma dome cuant che al cite lis oparis di chest Mattotti. Blanc e neri ancje par i doi Gio, insiorât di discussions filosofichis che lu nobilitin. Il colôr al torne inte ultime storie par rindi in maniere delicade la atmosfere oniriche de conte.
◆ Interessant il fat che lis contis a vedin ancje une morâl che e salte fûr. Inte prime: se tu âs vint une volte, nol è che tu puedis vinci simpri. Inte seconde: acetiti come che tu sês, cui tiei difiets e cui tiei limits. Inte tierce: la art e pues judâti a scjampâ fûr des presons de vite. Inte cuarte, il messaç lu esplicitin i autôrs stes: il mont che a nô nus pâr signestri, al è plui misteriôs, come se al fos intiessût di strentis armoniis profondis.
◆ Il libri al è completât dai profîi biografics e professionâi dai siet autôrs e dal verbâl de jurie che e met in lûs l’ecuilibri e il ritmi ben disvilupât de storie premiade. ❚