Masse int par un sôl planet

Ogni creature umane che par sô nature e prove sintiments, leint ce che o scrivarai culì nol pues no provâ disconfuart, incredulitât o rassegnazion. Pensâ al senari mondiâl futûr, sconvolt dal cambiament ambientâl, al pues puartâ a dismenteâ che butâsi jù nol covente a nuie. Vaîsi intor nol puarte risultâts; agjî, invezit, sì. Propit cun cheste premetidure, tocje scomençâ di cuatri peraulis: cambiaments climatics, feminisim e contracezion. Cuatri peraulis che a son in relazion strente inte otiche di un probleme planetari che si clame sorepopolazion. La soluzion no je ignorâ il probleme o sminuîlu, o impugnâ la sacralitât de vite berlant “Diu al proviôt” o “La sience e proviôt”. E je simpri la stesse convinzion: che di ducj i disastris che la umanitât e crearà, intun mût o chel altri, l’om al rivarà simpri a saltâi fûr. Ma sino tant sigûrs? Bisugne fevelâ cui numars, parcè che cun chei no si pues imbroiâ nissun.
◆ Intal 1815, la popolazion e contave un miliart di personis. Un secul dopo (1930) la cifre e jere dopleade: su la Tiere a vivevin doi miliarts di individuis. Vuê, il planet al ospite 7,8 miliarts di personis. In altris peraulis, la cressite e je stade esponenziâl: in novante agns, la popolazion e je deventade cuatri voltis di plui. Thomas Robert Malthus tal lontan 1798 al scriveve, tal so libri sul principi di sorepopolazion, che “Cui reams animâl e vegjetâl, la nature e à semenât in ducj i lûcs la semence de vite cuntune man prodighe e gjenerose. Ma e je stade ancje sparagnine tal dâur il spazi e il mangjâ necessari par tirâju sù”.
◆ Il significât di chest toc mi pâr clâr: i animâi (cjapât dentri l’om) a son tancj e lis risorsis pocjis. La popolazion e cres in maniere esponenziâl (il dopli, il cuadrupli, e v.i.), dulà che invezit il nudriment al aumente in maniere aritmetiche, duncje plui planc. Il risultât al è che il dopli dai animâi nol cjate il dopli dal nudriment, cence sfrutament e cence il “jutori” di fertilizants chimics te tiere. Chest al varà un limit. Cuant che o sarìn rivâts a chest limit, cemût si daraial di mangjâ a dute la int? Za cumò no si pues: di fat, pe ONU 820 milions di personis a patissin la fam. E alore, no ise vere che o sin masse su cheste Tiere e che prin o dopo l’ecuilibri za cumò precari si romparà? Propit par chest a son stadis adotadis politichis che a smirin a fâ calâ la popolazion. Paîs tant che Cine e Indie cence la politiche dal fi unic o dai doi fîs cumò a contaressin centenârs di milions di personis in plui; ma ce scuilibri varessino, stant che za cumò i lôr flums, par esempli, a son devastâts dal sec e dal incuinament? La veretât e je che, intun mont al limit, vuê o vivìn ducj intune risierve naturâl, e no plui intune plane salvadie e sconfinade. ❚