Il Friûl unît, di Gurize fin a Pordenon, al è une dimension essenziâl par elaborâ strategjiis economichis. Alberto Marchiori, president di Ascom Confcumierç Pordenon, za vicepresident de Cjamare di cumierç di Pordenon, aben che al sedi convint che no si puedi fâ di mancul di une ricomposizion istituzionâl de ex provincie di Pordenon, al saponte però une riprese fuarte di unitât di intindiments tra lis diviersis componentis dal Friûl.
«Lis Uti a son stadis un faliment – al sclarìs Marchiori -, bisugne tornâ a recuperâ la identitât teritoriâl za acuiside dal teritori dal Friûl Ocidentâl, e lu dîs tant che mantoan di divignince e furlan di adozion, e duncje cence prejudizis di sorte. Clamìnlis Provinciis o come che o volìn, ma a jerin lis istituzions plui dongje al teritori dopo dai Comuns. Bisugne tornâ aes Provinciis in maniere inovative, mudant la scalogne di jessi stâts i prins in Italie a volê abolî chest ent te oportunitât di creâ alc di plui moderni e che al rispuindi aes esigjencis di vuê. Il president des gnovis Provinciis al à di jessi elet in maniere direte dai citadins e i conseîrs a àn di garantî une rapresentance adeguade dal teritori».
__
Pordenon e Udin un cuintri di chel altri, duncje?
«La politiche e varès di fermâ sul nassi i caratars barufants dai teritoris e no sburtâ la cressite di cjampanii gnûfs come che cualchidun al va indevant a fâ. Si pues jessi di Tumieç o di Cordenons, ma cuant che si cjapin incarghis in Regjon si varès di lavorâ par ducj i citadins dal Friûl-Vignesie Julie. La Regjon, di bande sô, e varès soredut di distinguisi pe inovazion in ducj i setôrs legjislatîfs là che e à competence. A sun di volê acentrâ e gjestî dut di Triest, o sin rivâts a vê plui dipendents de Regjon Lombardie».
__
Daspò de crisi economiche dal 2008, il Friûl al à patît soredut dal pont di viste economic. Nol saressial il câs par chest teritori, caraterizât di carateristichis socioeconomichis comunis, di cjatâ fûr une unitât di intindiments e ancje un lûc istituzionâl di elaborazion strategjiche par frontâ insiemi lis sfidis dal avignî?
«E je vere. Tai agns passâts il Friûl, e massime la Provincie di Pordenon, al à vût il primât inte classifiche no invidiabile dai faliments aziendâi. Propit par chest motîf, Udin, Pordenon e Gurize a varessin di jessi plui unîts e lavorâ insiemi. Magari cussì no a esistin maniis di egjemonie, di une bande e di chê altre, e Gurize e je stade aromai sotanade cuasi dal dut dal ativisim triestin. Magari cussì no si inviisi simpri mâl. Lis provinciis di Udin e di Pordenon, che a son similis sot di ogni profîl socioeconomic, a varessin di scomençâ a lavorâ parsore di progjets concrets. Al è ce che o ai domandât in Cjamare di Cumierç. Bisugne lavorâ insiemi soredut intal cjamp dal ûs comun dai fonts europeans. Lis lotis pe egjemonie no fasin ben a di nissun, lis colaborazions operativis a judin a ridimensionâ i cjampanii. Par gno cont, lis istituzions politichis e economichis a varessin di restâ plui dongje che si pues ai citadins. Invezit dopo si à di razionalizâ lis societâts di servizis, cressint la cualitât di ce che al ven ufiert e ridusint i coscj, ma no si pues pensâ di resonâ in mût cussì economicistic inte sfere politiche e di rapresentance ancje identitarie dai citadins».
__
Ancje parcè che, se il Friûl nol rive a esprimi une strategjie unitarie, Triest le fâs di parone espotiche…
«Garantît. Triest par esempli nol pues pensâ di detâ di bessôl lis prioritâts de logjistiche, ma i interpuarts di Pordenon e di Çarvignan a àn di jessi part di une logjiche complessive che e ten cont ancje dai interès des impresis furlanis. L’obietîf al è lâ fûr dai propris confins. Magari cussì no o vin une vision strategjiche cu la lint di ingrandiment invezit che satelitâr, che al rive a cjalâ lontan e di adalt. Intune situazion di globalizazion bisugne savê proietâsi al esterni. Il model dal Trentin-Sud Tirôl al è vincidôr e al va copiât. Ma prime nus covente la capacitât progjetuâl e la voie di fâ insiemi. Tal periodi dopo dal taramot i furlans a àn dimostrât di vê chestis capacitâts. Magari cussì no o vin il cancar di une politiche cadavar che e va cambiade e ripuartade aes sôs origjins nobilis. No podìn vê oms politics di vecjo stamp che a pontin a contentâ i amîs a discapit dal futûr de comunitât. Chestis logjichis a van abolidis». ❚
Roberto Pensa