MANIFESTAZIONS. Poligon su la mont Bivare, bersai: Cjargne

Domenie ai 12 di Avost il Front Furlan al à organizât une manifestazion cuintri des operazions militârs che si dasvuelzin in Cjargne, in particolâr su la mont Bivare, lûc doprât come poligon stagjonâl. E someares une iniziative butade li, ma tabaiant cun Federico Simeoni, puarte vôs dal Front Furlan la impression si sfante di colp, anzit, si cjatin ducj i elements che l’autonomisim al varès di tignî a ments. Un trasferiment di 4000 paracadutiscj americans de Gjermanie ae caserme Dal Molin di Trevîs, al puartarès a fâ deventâ cheste monte un poligon stabil, doprât dut l’an in maniere pesante. Il dut passant sul cjâf de int e ancje dai organisim rapresentatîfs o des comissions che a varessin di operâ. Si zontin i svoi dai avions e elicotars di vuere che a passin parsore dute la Cjargne. Un alarm fuart chel pandût dal Front Furlan che nol à lassât di bessôi i organizatôrs, stant che ancje altris grops locâi ju àn seguîts, come Aghe di Mont e Cjargne in Moviment. No ultin l’impegn des maris de Cjargne, une vore preocupadis di ce che al ven sparât e lassât su lis monts, cui realtîfs pericui, ignorâts dai plui, sorestants in primis. «Une ocupazion militâr di un “Sît di Interès Comunitari” di alte valence paisagjistiche e naturalistiche intun comprensori là che dome la Regjon tai ultins 30 agns e à invistût svariâts centenârs di milions di euros», cussì al interven Simeoni in te sperance che la Regjon a vierzi il bec. Nancje i sorestants locâi si son fats sintî, probabilmentri, preocupâts, al zonte Simeoni, di sintî prin ce che a disin a Triest, evitant di jessi cjapâts pe golarine e di pierdi cualchi contribût, ecezion fate pal sindic di Soclêf che al à volût justificâ la sô mancjade presince. La Cjargne, par citâ une cjançon di Lino Straulino, “e je la mari dal Friûl” e se si lasse che chê realtât e muri, il vantaç al sarà dome par chei che a vuelin vê man libare su eletrodots, su risorsis idrichis, forestâls e pai zûcs militârs, il dut ignorant la int che taiant in continuazion i servizis e ven simpri plui sburtade a lassâ la Cjargne.
«A chest pont il destin al è in man nestre: o si ribelìn a cheste derive o tal zîr di 10 agns la Cjargne e mûr. E se e mûr la Cjargne daûr i va ancje la autonomie dal Friûl». Peraulis scletis chês di Simeoni, ma che a àn il savôr de veretât. ■
Mauro Della Schiava