Sfuei Mensîl Furlan Indipendent
Archivi de Patrie

L’unic che si à di crodiji cuant che al conte chê dal ors

Serena Fogolini
Lezion in Slovenie cui professôrs de universitât di Lubiane

Stefano Filacorda, responsabil sientific pal grup di ricercje dal Ateneu furlan su la faune salvadie

Un cors par imparâ a cognossi la faune salvadie des nestris Alps, cun lezions teorichis e pratichis su lis tecnichis di monitorament e di cature dai animâi, massime grancj carnivars, ungulâts e uciei.
◆ Al è chest l’intindiment de Winter School (scuele invernâl) in “Tecnichis di monitorament invernâl de faune alpine omeoterme” inviade de Universitât dal Friûl e rivade ae sô XI edizion, che si è tignude vie pal mês di Fevrâr intai Parcs naturâi de Regjon. Cinc dîs tal mieç de nature, cun escursions ator pes monts furlanis e slovenis (dongje Bohinj, li che al è in vore un progjet european di conservazion de linç), par cuasi 50 oris di formazion (cjapant dentri ancje l’esam finâl) cun docents universitaris e altris esperts, par une formazion complete su lis carateristichis biologjichis e ecologjichis des bestiis salvadiis, e su lis proceduris principâls par monitorâlis (in maniere plui o mancul invasive).
◆ Tra lis materiis, in plui di chês di caratar introdutîf, tant che la sigurece in mont o la gjestion dal Parc Naturâl des Prealps Juliis, al ven frontât il snowtracking, ven a stâi il ricognossiment des olmis te nêf, doprant ancje i cjans pal monitorament. Si passe dopo a scuvierzi alc di plui sui rapaçs noturnis e su lis lôr vôs, par dopo cognossi miôr i struments par cjapâ lis bestiis (foto e videotrapulis, lescjis), adun cun nozions di telemetrie classiche e satelitâr par imparâ a predisponi i golârs e a regjistrâ i dâts. A vegnin introdusudis ancje lis tecnichis di jackal/wolf howling, par imparâ a ricognossi de vôs il siacal o il lôf. Cun di plui, a vegnin cjapâts in esam ancje i tetraonidis (pernîs, gjal di mont e v.i.) e i ungulâts, tant che cjamoçs o stambecs.
◆ Une ocasion di no pierdi par students universitaris ma ancje par tancj passionâts e par cualchi curiôs, che in chescj agns e à tirât dongje sù par jù uns 400 corsiscj (chest an i partecipants a son stâts 21, ma a son stadis edizions li che si à scugnût vierzi plui cors par vie dal numar di domandis). Une scuele ancje di vite, che e à dade la pussibilitât a tancj di lôr di condividi esperiencis e siums, tant che il progjet dal vilaç dai ors di Pulfar, un centri didatic e divulgatîf che al à funzionât par passe 10 agns e che cumò al è sierât, aben che la associazion e sedi ancjemò in vore, cui volontaris impegnâts in prime linie par fâ cognossi e rispietâ i nestris vicins animâi, daûr di chê che e varès di jessi la vere acezion de detule “l’om al è il paron dal mont”: un patronus che nol comande, ma che al à a cûr la nature e che al cîr di protezile.

Un ors

_
La storie dal ors? Al è cui che le sa contâ ben
Il diretôr responsabil de Winter School al è il professôr Stefano Filacorda, ricercjadôr in zootecniche speciâl, docent te Universitât dal Friûl e te Universitât libare di Bolzan, e cun di plui ancje responsabil sientific pal grup di ricercje, conservazion e gjestion de faune salvadie dal Ateneu furlan. Al è lui, di fat, a stâ daûr ai progjets di monitorament di tantis bestiis che si cjatin a passâ pal Friûl o che si fermin te nestre Regjon, massime cuant che si fevele di grancj carnivars, tant che il lôf o l’ors.
_
Ma cemût funzionial il monitorament di chescj animâi?
Prin di dut bisugne dî che il monitorament e la ricercje no lis fasin dome la Universitât di Udin e di Triest, ma a son tancj altris ents che a colaborin, tant che la Regjon, midiant dai servizis e dal cuarp forestâl. Ore presint, o sin une vore impegnâts sul ors, ma soredut sul lôf, che e je la grande emergjence di cumò.
A son pardabon cetantis tecnichis par podê studiâ chescj animâi: midiant de ricercje des olmis, cu lis fotocjamaris e ancje metintjur intor i radiogolârs, une volte che si à rivât adore a cjapâju. E dopo bisugne fevelâ cu lis personis. Par me, il nestri lavôr nol è dome chel intor des bestiis, ma ancje chel di rivâ a comunicâ cu la int, massime chê di mont, che e à un savê che tantis voltis noaltris che o sin intes universitâts no sin bogns di valorizâ te maniere juste. Al è impuartant cirî di fâ un percors ducj insiemi, arlevadôrs, forestâi, ricercjadôrs e citadins, di mût di condividi lis informazions, par rivâ a capî parcè che chestis bestiis a son daûr a tornâ achì, e ancje i problemis che a puartin.
_
Ce ideis si fasie la int, massime i arlevadôrs, che a podaressin patî dams de vignude di chestis bestiis salvadiis?
Al è clâr che chest al è un probleme, par vie che i lôfs a son tornâts dopo scuasit 100 agns che a jerin disparîts, duncje si à dismenteât cemût frontâ chescj temis. Cualchidun al à patît par vie de presince dal lôf e dal ors, ancje parcè che i dams a puedin fâ sierâ lis realtâts plui piçulis, dut câs o pues dî che dai arlevadôrs e rive une grande fuarce positive e si prove a cjatâ soluzions in maniere competente. Bisugne ancje marcâ che la Regjon e cîr di jessi dongje midiant di finanziaments par sierais e par doprâ i cjans, in plui di compensâ lis pierditis dai animâi.
_
Si rivie a vê une idee dal numar di lôfs presints in Friûl?
I numars a son avonde clârs. O vin almancul 6 trops che si son riprodusûts vie pal Istât, duncje almancul 30 bestiis. Po dopo, bisugne zontâ lis cubiis che a son daûr a formâsi e chei che a son bessôi, duncje sigûr uns 40-45 elements.
O vês di pensâ che il lôf no si lu cjate dome su lis monts, ma ancje dilunc dai flums, fin a Codroip, par capîsi, ma facil che a sedin individuis ancje inte Basse. Bisugne dut câs marcâ che i lôfs a àn un sisteme di regolazion incredibil, li che ogni trop al difint il so teritori, duncje il numar nol podarà incressi ancjemò di masse.
_
No si rivaraie a un program par copâju, daûr di ce che a fasin in Slovenie pai ors?
Al va dit che in Slovenie a son passe 1.000 ors, duncje ogni an a vegnin copâts uns 200 di lôr par contignîju dome intes areis forestâls. I ors si ju cjate ancje intes Alps, ma a son tancj di mancul. Ca di noaltris a ’nd è dome uns 5, e dome un di lôr al fâs dams, par altri al à il golâr, duncje noaltris o cirìn di visâ i arlevadôrs a pene che si môf. Al è il mitic Francesco, e al vîf in Cjargne di tancj agns, si che la int si è usade e al è deventât une sorte di mascotte. No sai ce che a varan voie di fâ in Italie cui lôfs, ma o crôt che il nestri al sedi un model cetant interessant, ancje par chei altris paîs. Noaltris o vin passe 3.300 lôfs in dute Italie, cuasi 1.000 intes Alps. O sin un dai pôcs stâts in Europe cuntun numar tant alt di lôfs e cence un plan par copâju. Pensait che o vin plui lôfs in Friûl-Vignesie Julie che in Norvegje, che alì pene che a van fûr di ciertis zonis ur train daurman. Duncje al è ancje un aspiet positîf in cheste gjestion. Che po, copâ cualchi esemplâr nol coventarà a nuie. Clare che dopo, se a saltin fûr lôfs cun compuartaments particolârs, bisugne intervignî, ma i problemis a son altris.

_
Il lôf saraial une presince stabile te nestre regjon?
Il lôf aromai nol larà plui vie dal Friûl, ancje parcè che la nature e je dal dut diferente. Tantis voltis, invezit di sbarâ, e bastarès une presince plui fuarte di bande dal om in lûcs che a son aromai dispopolâts. I numars di ors invezit no cressaran, par vie che ju copin in Slovenie, biel che invezit a son in cressite i esemplârs di siacal dorât inte plane.
_
E cheste specie, di dulà ise rivade?
Il siacal dorât al è rivât pe prime volte te nestre regjon tai agns Otante de Dalmazie e de Istrie, par vie che si jere slargjade la popolazion in Bulgarie, Grecie e Jugoslavie. Al è une sorte di piçul lôf incredibil, che al rive a adatâsi une vore ben in ducj i ambients, si che duncje al è rivât fin in Danimarcje, Olande e fintremai in Siberie. Al è un animâl che però al à pôre dal lôf, duncje al è daûr a scjampâ vie di zonis li che si cjate cheste altre bestie, tant che sù pes monts de Cjargne.
_
Une ultime bestie che e je daûr a tornâ tai nestris flums e je la lodre. Dulà si cjatie par cumò?
La lodre e dimostre une capacitât straordenarie di tornâ a cjapâsi i siei spazis. Par cumò le cjatìn tal Tiliment, di li che al nas fin a San Denêl, in plui che tai siei afluents. Si le cjate ancje tes culinis morenichis, tal Lusinç, tal Vipau, tal tarvisian, ma ancje tai riui de Cjargne. No son in tancj a jessisi inacuarts che e je presinte di gnûf, dome i fotonaturaliscj apassionâts. Al è probabil che la ultime part li che e tornarà e sarà la fôs dal Stele, par vie che e je rivade de Austrie e de Slovenie, ma biel planc e tornarà a colonizâ la plane, li che cumò invezit si cjate la nutrie.
_
Si crearaial un conflit tra nutrie e lodre?
A son dôs speciis cun alimentazions dal dut diviersis, dut câs si pues dî che si dan un ciert fastidi tra di lôr. Cun di plui, cumò al è presint ancje il siacal dorât, che al è predadôr di dutis lis dôs bestiis. Tai nestris flums e boscs al è in vore un sisteme di adatament straordenari, e in tancj no si rindin nancje cont di chest tesaur che o vin. ❚

Gnovis / “Feminis furlanis fuartis” di Erika Adami a vicino/lontano e al Salon internazionâl dal libri di Turin

Redazion
La Patrie dal Friûl e segnale doi apontaments che le viodin protagoniste cul libri “Feminis furlanis fuartis” di Erika Adami, che e fâs part de golaine “La machine dal timp”. Te suaze dal festival vicino/lontano, rivât ae vincjesime edizion, Erika Adami e moderarà l’incuintri “Feminis. Talents di no strassâ” che al nas des esperiencis contadis […] lei di plui +

Comunicât / Cungjò, Aureli. Nus lasse un grant omp, Aureli Argemì, che si è batût pai dirits dal popul catalan e par chei di ducj i popui minorizâts. Il comunicât in lenghe catalane e furlane.

Dree Venier
BARCELONA Aureli Argemí, fundador i president emèrit del Centre Internacional Escarré per a les Minories Ètniques i les Nacions (CIEMEN), ha mort aquest dilluns als 88 anys, segons ha informat l’entitat en un comunicat. Nascut a Sabadell el 1936 i llicenciat en teologia a Roma i París, va ser monjo de Montserrat, va formar part […] lei di plui +

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +