Lunari Di Pre Toni 2015

Ancje chest an il grup di amîs che di agns si cjate, al à tornât a meti dongje il Lunari dedicât a pre Antoni Beline. La publicazion pal 2015 e propon une racuelte di siei scrits, che nus compagnaran tai mês dal an che alo ven, tant che segn di sperance e sostegn te fadie dal vivi. Come pal solit, pre Antoni si indrece a nô – la sô int – cu la nestre lenghe, intun discors furlan diret, concret, lontan di retoriche o bielisie leterarie, simpri orientât ae sostance, al essenziâl. Lui al cognòs il pericul che e corìn, ta chest timp complès e conturbât, di pierdisi te confusion, te banalitât, ta l’omologazion a un eficientissim cence anime, tal cori continui cence savê ben parcè. Nus domande di jessi fedêi aes claris, rustichis virtûts des lidrîs, a un progjet di vite e di comunitât autentichis, onestis, fondadis sui valôrs che a durin. Il messaç al è indreçât a ducj: ai zovins te lôr dibisugne di afiet sperance e regulis; ai adults clamâts a fondâ la famee sul volêsi ben, zermoi de pâs tal mont; ai vecjos, patrimoni di esperience e memorie storiche di scoltâ; ae societât che e je sane se ognidun nol pense dome ai siei interès, ma ancje a chei di chei altris. Pre Antoni nus fevele di ce che al vâl e di ce che al è svoladi, dal ordenari e dal misteri, di realtâts di passaç e di bens eternis. Te limpide profonditât des sôs peraulis – vivis e di straordenarie atualitât – si sint la stature di une vuide che e segne il troi, la tignince di un cret tal disorientament dominant. Il lôr rivoc interiôr al è risultive di fiducie e confuart.
Il lunari, metût adun par cure di Cristian Liberale, Alida Pevere, Manuela Quaglia, al à in ogni pagjine lis pituris di artiscj regjonâi. Si podarà cjatâlu in glesie a Visepente, te edicule “Curiosità” di Visepente, in cartolarie “Cartoltecnica” a Cjampfuarmit, tal bar-edicule “Ogni bene” di Basilian, tal bar “Masino” di Mels (Colorêt di Montalban), tal minimarket “Da Lidia” di Maian, intes glesiis di Vît (PN). Dut il rigjavât de vendite al sarà dât ae “Associazione Amici di Udine” che e fasarà poçs e scuelis in Cueste di Avori e Benin, opare inviade di pre Beline.
“Che si sinti, tes fameis, ancje la presince di Diu. No dome chê de television e dai zirediscs. Alore o frontarês serens ben e mâl e nûl e ploie e bontimp, furtune e disgraciis. Parcè che al sarà Diu il cjantonâl de cjase e dal paîs (…) Tirait sù i fîs cun afiet. Al coste mancul des “patatinis” e al rint di plui. No stait a vê pôre di pierdi timp a fevelâ cu la vuestre canaie, ancje cuant che a son di nît. A valin plui chês peraulis alì che no ducj i discors che a sintaran te lôr vite (…) Dut il ben che o vês vût dai vecjos, passaitlu ai fîs, pussibilmentri zontant alc di vuestri.” Pre Antoni Beline, Lunari pal 2015 ❚
Redazion