Luciano Lunazzi il creadôr de pop art furlane. Nus à lassâts un mît plen di bontât

“L’om di carton”, “l’hippie zentîl”, “il mestri di vite”, l’artist cjargnel Luciano Lunazzi, origjinari di Cjaline di Davâr, nus à lassâts ae etât di 65 agns, ai 4 di Otubar, par vie di un mâl improvîs, un infart che lu à cjapât tal sium inte sô cjase a Udin. Il grant displasê de sô partence al è stât di ducj i furlans, e no dome di chei passionâts di art. Di fat, il so funerâl inte glesie dal cimitieri di Sant Vît, realizât midiant di une colete pal paiament des spesis, al à viodût la presince di cetante int, amîs, cognossints, preseadôrs che lu àn ricuardât cun poesiis, testemoneancis, contis, la sole presince, il sun di une armoniche e la bandiere dal Friûl.
Il “re dai tacons”, la muse, la barbe e la vôs des “pirulis par furlan” che lu an rindût cetant famôs in Patrie e fûr, midiant de rêt. Un om ad ogni mût reâl, pûr e assurt. Si lu podeve cjatâ un pôc dapardut, dal Stadi Friuli aes sagris, aes mostris, ai concierts, aes ostariis, dentri e fûr, cui siei vistîts stravagants, dulà che no mancjave mai une citazion par furlan. Vûstu cuntune scrite te maiute, o te barete, o te borsete. Cussì lis sôs oparis, ispiradis ae pop art. Un fenomen che al à rinovât fin a fâlu dut so.
Une pop-art furlane, dulà che “Campbell Soup” di Andy Wahrol e devente “Brovade e Muset”, par esempli, o “Panoles Underground” e lis versions in marilenghe des iconis dal rock. I siei autobus multicolôr, lis sôs sacumis a la Haring, i siei “Strange Cats”, i morârs e i “Flux kids”, simbui di deventâ ideis par spilutis, gadgets, art di meti intor.
Un om che al à viazât par 25 agns ator pal mont: Iran, Pakistan, Indie e dute la Europe, la Australie e lis Americhis e in tancj altris lûcs, des grandis metropolis ai paisuts dismenteâts. Ambients dai plui diferents, esperiencis che a àn jemplade la sô valîs di artist e pensadôr, tornât in Friûl.
Al mancje bielzà Luciano, lui che al voleve e si inzegnave ae creazion di un coletîf di artiscj furlans – no par fuarce a nivel anagrafic, ma di culture (cussì mi à dit intune ocasion) -, bogns di fâsi ricognossi tant che une realtât fuarte, di jessi sostignude de Regjon inte stesse maniere de musiche, dal audiovisîf e dal teatri. Di ciert, Luciano al è e al reste un dai artiscj furlans plui origjinâi de contemporaneitât.