Lis rogazions: metafore di vite Lis grandis ai 25 di Avrîl, lis piçulis trê dîs prime de Sense

«A fulgure et tempestate…a flagello terraemotus…a peste, fame et bello…», al recite il plevan percorint e benedint lis campagnis la dì di Sant Marc e prin de Sense, cu la int in procession che in côr e rispuint: «Libera nos Domine», passant di cjamp in cjamp, di prât in prât, tal viert de nature. Lis litaniis des rogazions a contegnin dut il significât pûr di un rît antîc, contadin, segn di pinitince e di propiziazion, celebrât par ingraciâsi la racuelte, preant il Signôr. La aghe sante, la crôs, une fuee di ulîf e un tic di cere benedete in glesie, chescj a son i simbui dal rituâl di origjins romanis che il popul furlan al à tramandât di gjenerazion in gjenerazion, cuntune continuitât esemplâr, almancul fin ai agns Setante.
Tal cors de cerimonie, intant che il predi al slargje la aghe sante a man drete e a man çampe, fermantsi tes croseris par benedî i cuatri cjantons, la blave, il forment e lis jerbis medichis, i fruts a fasin crosutis cui claps e cu la jerbe, par dispiet, di fâ inçopedâ il corteu. Un mût gaiarin di vivi contents il moment de cerimonie, spietant di fâ gulizion sui cjamps prin di lâ a scuele. Un vivi sempliç e comunitari, simbul di une civiltât contadine che e rimet ae nature dutis lis sperancis di vite. In gjenar, lis rogazions maiôrs, di origjin romane, si fasin ai 25 di Avrîl, invezit lis minôrs, tramandadis de Galie, tai trê dîs prime de Sense.
Bandonâts simpri di plui i lavôrs inte campagne, ancje il rît al à tacât a dispierdisi. A chest sviliment al à contribuît ancje il Concili Vatican Secont, scancelant intal calendari liturgjic lis rogazions maiôrs e riviodint lis minôrs, no plui leadis ae Sense. Di gracie che il rît al reste presint ancjemò in diviersis localitâts dal nestri Friûl, dulà che il popul, dut dongje – feminis, oms, fruts e zoventût – al vîf unît il significât, il valôr di chestis suplichis in timp di Vierte, nassudis par sodisfâ i bisugns de int e de tiere, leâts con fuarce l’un cu l’altri. Nô us segnalìn chês di Paulâr, te seconde fin di setemane di Mai e La bussade des crôs inte Plêf di Sant Pieri a Zui, cu lis rogazions viers il Plan de Vincule. ❚
✒ Alessio Screm