Stant che o sin tal cûr de Cuaresime, mi à parût ninin proponi cheste parabulute di pre Antoni. La Cuaresime al è un timp particolâr pal mont cristian, timp di preparazion a la grande Pasche. Al è impuartant cirî obietîfs grancj, meti in vore siums interiôrs che, impegnantsi cun costance, o procurìn di realizâju. La preiere e varès di jessi l’ategjament normâl par chest moment religjôs che o vivìn. Ancje il gjat al à ce insegnânus.
pre Roman Michelot
Il gjat
Intal Vanzeli al è scrit che si à di tignî simpri preât, cence mai stufâsi. E al puarte l’esempli dal judiç cence cussience, che al scuen fâi justizie a une puare vedue parcè che jê no lu lasse in pâs. Tant a dî che o vin di stufâ Diu fin che no nus scolte.
Il gno gjat nol è catolic e nol à let il Vanzeli. Però cheste baronade le à di simpri.
Cuant che al à voie di jentrâ, si met denant de puarte. Prime al sta un lamp cuiet, sperant che lu viodi e lu fasi jentrâ. Po al tache a sgarfâ cu lis ongulis e al à imparât ancje a saltâ par viodi se al rive a sbassâ la cluche. Se nol cumbine nancje cun chel, al tache a gnaulâ e al è sigûr che mi stufi prime jo di scoltâlu che lui di gnaulâ.
Fin che, rugnint o rugnant, mi tocje vierzi. E lui al jentre pacjific, cence nissune premure e cence pêl di pintiment di vêmi fat jevâ a cualsisei ore di gnot.
Par chel, o dîs che il Ream dai cîi al è compagn dal gno gjat.
di pre Antoni Beline
